―Harumamay mo la! Gindarahugan kami han alperes ngan ginsiring nga ikaw diri ka totoo nga ikaw! An aswang nga lagas linmusad may dara nga latigo ngan ini, napapagbuyaktad la . . . usa nga lalaki!
―Aha!― sinmiring hi Sinang, ―nag-araway waray kita pakakita.
―Nginihuan an doktor han alperes!― ngani Victoria.
―Yana ngahaw makadto kami ha Manila; ikaw, bilin ka dinhi basi ayaton mo pakiaway, ta, kun diri igsusumat ko kan Santiago nga buwa an imo iginsinumat ha iya, susumatan ko....
―Kundi, Da. Victorina, Da. Victorina!― ginsaway ni Linares nga ginduduas ngan pinmaharani,― panginano; ayaw ako papanumduma... ― ngan gurugution an tingog; ―ayaw pataksi la iton imo baba, labi na yana nga uras.
Hamtang nahananabo ini, naabot man hi Kapitan Tiyago, masamdong ngan nagpapanhayhayon: waray pagdaog an iya buranting.
Waray ngani paginhawaa ni Da. Victorina; ha pira kapulong, upod in damo nga buyayaw, ginsayuran han nahinabo, kundi gintalinguha niya nga an iya asoy diri ha iya makaraot.
―Aayaton ni Linares, maaram ka? Kun diri, ayaw karuyaga nga mangasawa hinin imo anak, ayaw tuguti! An waray kaisog diri angay ni Clarita!
―Napaasawa ka ngayan hito nga lalaki?― pinmakiana hi Sinang nga iginpapanluha an maglipayon nga mga mata; maaram ako nga diri ka mayakan kundi hunahuna ko nga diri ka sabringat.
Hi Maria Clara, duason daw an taro, ginmangkaaw ngan sinmiplat hin haluag nga mata ha iya amay, kan Da. Victorina ngan kan Linares. Ini nahakaawod, hi Kapitan Tiyago tinmamod ngan an ginang nagyakan pagkasiring:
―Tigamni, Clarita; ayaw paasawa hin tawo nga diri maaram magdara hin saruwal; pagdadarahugan ka pati hin kaayaman.
Kundi an daraga waray baton, sinmiring la han iya kasangkayan:
―Dad'a ako niyo ngadto ha sulod kay diri pa ako nakakaglugaring pagpitad.
Binuligan pagbuhat, ngan gamulon hiya ha hawak han iya duha nga sangkay, isinasandig an ulo ha sugbong han
