―Pag-aabot ko pa la, nagdayon la ako nganhi pagkita ha imo... Hunahuna ko adto nga diri ka pa nakakabuhat.
Hi Maria Clara baga hinmuram hin kangula; waray pagyayakan, nagtitinamod la.
Siniplatan ni Ibarra hi Linares tikang ha tiil ngadto ha ulo, siplat nga inatuhan han awdanon nga batan'on, waray pagpamirukpirok.
―Oo, naabat ako nga inin akon pagkanhi diri ginpapamulat, ― namulong hin hinayhinay; ―pasaylua ako, Maria, nga waray ako anay pakagpasabot mga sano pag- sasayuran ko na la ikaw hinin akon pagsugad... magkikita pa gad kita... sabuot ko.
Inin urhi nga mga pulong inupdan hin siplat ngadto kan Linares. An daraga sinmiplat ngadto kan Ibarra han iya magtahom nga mga mata nga puno hin kauray ug kasamdong. paniplat nga kanan tikos nga panginyupo nga hi Ibarra nahapaukoy ngan nagupong.
―Makahimo ako pagkanhi buwas?
―Sayod ka man nga an baga ha akon kakarawton ka dinhi gihapon hin maupay,―binmaton an tuman.
Hi Ibarra linmakat, pagkit'on baga waray dara nga kasakitan, kundi ha sakob may binabati nga mabug-at ha pamurubuot ngan hin kahagkot ha kasingkasing. An iya hadto nga uras kinita ug inabat ha balatian diri sadang matukib: ano ba adto? Ruhaduha, paglingo, paghagkot han higugma?
―Oh, babayi gad man gud!― nganiya pa.
Waray hiya sabot nga sinmangpot hiya ngadto han gintitindugan han liburan. Maupay in lakat han mga buhat: ni Nyor Juan, bitbit an iya mitrusan ngan han iya kutod nagtitinaratara han kadam'an nga magburuhat. Han pakakita ha iya dumaop.
―D. Crisostomo, ― nganiya, ―maupay kay inmabot ka; ginhihinulat ka namon ngatanan; kitaa daw inin mga kuta may ada na usa kametros ngan napulo kasentimetros an kahitaas; ha sulod hin duha kaadlaw masugad na kahitaas hin tawo. Waray ako karawat kun diri ngatanan hamurawon, dungon, patsaragon, ipil; nagtugon ako hin barayong, gisok, pino ngan hin naga nga gagamiton ha pamalay. Karuyag ka kumita han mga bodega ha ilarom han tuna?
An mga magburuhat namaghatag hin katalahuran han batan'on ngannaghin paniguro pagbuhat kamtang nakada pa
