pagmatuod han dara ni Sr. Ibarra kakulop...kun asya ini, D. Santiago waray na makaurulang.
Hi Maria Clara nga nakada nalingkod ha piyano, ginbubutnga han duduha nga iya mga sangkay, nag-iburuhat, kundi linuyahan, linmingkod la liwat. Hi Linares ginduduas ngan sinmiplat kan Kapitan Tiyago, ngan ini man tinmungok han mata ngadto ha ubos.
―Nagtitikamaupay ha akon pagkita ito nga batan'on, ―nagpadayon an padi. ―Ha siyahan pinakasiring ko nga maraot... may gutiay nga kamadagmit mangalas kundi maaram mag-ayad hiton iya kasaypanan nga waray makakahimo hin pagdumot. Kun diri la tungod kan P. Damaso... Ngan an padi sinmiplat hin dalidali kan Maria Clara nga nagpipinamati kundi waray ibubulag an mga mata didto han musika, bisan ginduduro hin kuribot ni Sinang nga dako an paghikalipay; kun waray la ha ira nagkikinita bangin sinmayaw.
―Hi P. Damaso? . . . ―nagpakiana hi Linares.
―Oo, hi P. Damaso nagsiring, nagpadayon and padi waray bubulag pagkinita kan Maria Clara, ―nga tungod nga... amay hiya ha bunyag, diri hiya matugot. . . kundi sabuot ko, kun hi Go. Ibarra mangaro hin pasaylo, ngan waray ko ruhaduha nga mangangaro, bangin kun maayad ngatanan.
Hi Maria Clara binmuhat, pinmasangil hin bisan la ano, ngan mapakadto ha iya sulod binunyugan ni Victoria.
―Ta, kun diri pasayluon ni P. Damaso?―nagpakiana hin gutiay nga tingog hi Kapitan Tiyago.
―Kun asya ito . . . hi Maria Clara an manhunahuna ... hi P. Damaso amo an iya amay...ha kalag; kundi ha akon paghunahuna magkakasarabot.
Hadto ngahaw nadungog in badukbadok nga ha gilayon sinmaka hi Ibarra nga nasusunod ni Dada Isabel; an iya pag-abot nakahatag hin magkalainlain nga kilos han tagsatagsa. Nakigkatahod hin makiaangayon kan Kapitan Tiyago, nga waray sabot kun matawa ngan makiglamano ha iya hin pakighinasa nga hi Ibarra waray pakailob hin diri hapausa.
―Ayaw hitingala,― sinmiring hi Fr. Salvi; ―gindidinayaw ko ikaw adto pa la.
Hi Ibarra nagpasalamat ngan pumaharani kan Sinang.
