An Musa iginduruas.
—Senyor alperes, yana papatayon mo ako hin lambanganiya; —niyan nga gab-i bubulson ako hiton imo asawa kun maghangkop kamo.
—Pataya hin lamba; gauma iton baba! — ginmuliat an alperes, nangingisog ngan ikinukurog hin kasina.
Baga sugad hin waray iba nga ginhuhulat ni Tarsilo kun diri an gaom ha baba kay han kagaom na, ha iya mga mata inabat in kalipay.
Ha usa nga sinyas han alperes, tinmikang in usa nga sundalo, nga may bitbit nga uway, han iya mapait nga buruhaton. Kinmuro an bug-os nga lawas ni Tarsilo; usa nga agumod nga halarom ug halawig binati, bisan nasasarop an iya baba han dugnit nga gaom; itinungok an ulo: an iya panapton gilayon nagkadugo.
Hi P. Salvi iginduduas, nababalabag an paniplat, binmuhat, sinminyas han iya kamot ngan inmiwas dida han ruwang nagsasarusangko an pitad. Didto ha tuna nakakita hin usa nga daraga nga nasandig dida ha kuta, itinitikig an lawas, waray pagkikiwa, nagpipinamati, ha kahaluagan an paniplat, idinuduon hin makusog an mga kamot dida han kuta. Sinisirakan han mapaso nga adlaw. Baga nag-iinihap, waray giruginhawa, han linagatob ngan han inagumod nga makapapaid. Amo hiya an bugto nga babayi ni Tarsilo.
Didto ha ruwang waray ihuhunong adto nga paguwa; an ginlalamba, kapoy na han dako nga pinamamati, waray na pagtitingol, naghuhulat na la nga pan-gul’an an iya mga berdugo. Katapos, ginul’an gihapon an sundalo, tinunton an mga kamot, naghihingahinga; an alperes iginduduas hin kasina ngan nagsugo nga hubaran.
Dida hini hi Da. Consolacion binmuhat ngan hinmuring han iya bana hin pira kapulong. An bana tinmangdo.
—Dad’a ha bubon!—(3) nagsiring.
An mga pilipinhon maaram kun ano an karuyag hini sidngon; ha aton pa, igtutunlob. Waray kami sasabot kun hino an nagtuha hini nga paagi, kundi natatahapan namon nga tingali tikang pa ha kamaihaan nga panahon. Tingali. usa ini nga badyangas nga pagpahayag han kasiringanon nga an Kamatuuran ginmawas ha timba.
Didto ha butnga han sakob ha luyo han tribunal may uusa nga timba nga binatuan an ganggang. May usa nga
