450
ka, iginsumbong ngan iginbaligya han imo la ngahaw igkasi lungon hin tuna, hito nga adlaw igdudumiri mo, ikaw, an imo tuna pati an ngatanan.
—Iton imo pulong, sangkay ko, nakakapikas hinin akon dughan,— nagsiring hi Ibarra nabibido.
Hi Elias tinmamod, nag-isip ngan binmalik pagyakan:
—Karuyag ko, la, senyor pagpakita ha imo han totoo ko nga binabati ngan paghirot nga magmasakit an imo kabubwason. Panumduma adton paghimangraw naton dinhihini nga baluto, usa kagab-i nga bulanon, mausa kabulan na ngada yana, kumapin kun kumulang; hadto nga panahon malipayon ka pa. An mga inuungara han mga waray palad waray ha imo paabot; waray mo pamatii an ira sumbong kay sumbong hin mga magtinalapasnon; say mo lugod pinamatian an ira mga kaaway ngan, bisan dako kaupay an akon mga pangamaya, ginmapil ka ngadto han mga magtalumpigos ngan nakada la ha imo kamot nga ako maginusa nga tulisan, nakada ha imo nga pumapatay ako pagtuman hin usa nga marahalon nga pulong. Waray itugot sa Dios kay an tigurang nga namumuno han mga tulisan inamatay . . . Nahagos in usa kabulan ngan yana lain na animo panhunahuna!
—Katadungan mo, Elias, kundi inin tawo arualagad la han panahon: hadto napipiyong an mata ko, waray la ha akon, ngan ambot ano pa! Yana an maraot nga palad say nakapukrat han akon mata; yana kinikita ko an makalilisang nga baos nga nagdidinunot han aton bungto, nga nagtirirangrang ha iya mga unod ngan nagkikinahanglan nga kadkaron basi makuha. Ginpukrat nira an akon mga mata, ipinakita ha akon an kasamdan ngan iginpirit ha akon an pagkamatinalapasnon! Kay ira man karuyag, magiginpilibustero ako, kundi pilibustero nga totoo; tatawagon ko an nga tanan nga waray palad, an ngatanan nga nabati ha sakob han iya dughan nga may nagpuputok nga kasingkasing, adton ngatanan nga nagsugo ha imo pagdangop ha akon. . .diri, diri ako magigintampalasan diri tampalasan an nangangaway tungod han iya tuna, diri! Kita, ha sulod hin tulo kagatos katuig inagbayan ta hira, inungad’an ta hin higugma, ginhingyapan ta hin pakigkaburugto, ano an iginbalos ha aton? An pagdarahog ug pagtiawtiaw, an pagdad’a ha aton hin diri sugad hin tawo. An Dios, sugad han siring, diri matalikod ha aton kay binmulig man han iba nga mga
