kasangpit han nakaturog ko nga mga pagbati ug nakakaaghat han akon kasingkasing hin pagdumdom han siyahan nga mga adlaw han akon pagkabata, han aton mga
kalipay, han aton mga uyag, adto ngatanan nga mga ginagian ko nga ginlipay mo hamtang nakada ka ha bungto. Pinakasugad ko ikaw hin usa nga hada, usa nga diri lawasnon, usa nga ladawan han Tuna nga Natawhan, mahusay, waray labyaw, maaghop ngan mahigugmaon nga anak han Pilipinas, han hini nga makaruruyag nga tuna nga ginkakatirig-uban han lunlon kaupayan han Iroy nga Espanya ngan han mga katahuman hin usa nga batan’on pa nga
bungto, sugad han pagkatirig-ob dida ha imo han ngatanan
nga kamahusay ug kamatahom nga nakakarayandayan hinin duduha nga tuna;(8) salit an imo higugma ngan han akon pagsaho han natawhan nga tuna nagkakausa la . . . Hikakalimtan ta ba ikaw? Ha nakadamo nga panahon baga
sugad ako hin nakakabati han tunog han imo piyano ngan
han imo tingog, ngan kanunay didto ha Alemania, kun
mga kulupay, kun magsuduysudoy ako ha mga kakahuyan
nga tugob han magpakatitingala nga mga inop han ira
mga tigsiday ug han mga surupaton nga susumaton han ira
una nga mga tawo, hinnunumduman ko an imo ngaran,
sugad ko ikaw hin nakikita dida ha butnga han burong nga
nausbok tikang didto han siong, baga sugad ko hin nababati an imo tingog dida han hinagusihis han mga dahon . . .
ngan kun an mga parauma, nagpapanguli tikang ha ira buhat, napabati tikang ha hirayo han ira mga ambahanon,
daw sugad hira hin naduyog han akon kasingkasing nga
nag-aawit ha imo, nga say nakakabuhi han akon mga inop
ug mga paghingyap. Usahay danay ako lumunghayaw dida
han mga dalan ha kabukiran ug masukot ako didto hiabutan han hinayhinay nga kagab-ihon nga aadto pa ako nawawara didto han damo nga kadalanan pagpinamiling han
sadang ulputan paggawas tikang ha butnga han kakahuyan;
ngan kun daw nasulhog an bulan ha butnga han magrabong nga dahon ug mga sanga, baga sugad ta ikaw hin
nakikita didto ha buod han kagurangan nga usa nga lambong nga nagtatara han kasighutan, nga danay matago
ngan makita na man dida han lambong ug kapaw’an nga
nagsasamaysamay; ngan kun pananglit usa nga tamsi hindudunggan ko an iya matil-is nga huni, nakakasiring ako nga
an iya pag-awit tungod kay nakita ha imo ug imo ginaagda. Unob gud an pagdumdom ko ha imo! An dan-ag
