ngarigo didto han salog nga linilindungan han kakawayanan. Ha mga tangpi nanunubo in damn nga mga banwa ug mga bukad nga urusahon an mga ngaran nga imo ha
akon iginsisinumat hin linatin ngan kinatsila, kay nagtutuon ka na hadto ha Ateneo.(15) Waray la ako ha imo pagaasa; nahamamalanga ako panakop han mga alibangbang ug mga tambuburay nga dida han ira lawas nga gamayay,
baga an dagom, inaabat an ngatanan nga tina han balangaw ngan an laniban nga inggat han ladyaw, nga naghahapunhapon ug nagpapatupalanat dida han mga bukad;
usahay buot ko kalitan pagdakop an mga iruisdaay nga maglatos sumulinap dida han mga lumot ug mga bato ha ligid han tubig. Waray kaiha nawara ka, ngan han imo pag-ulpot may dara mo nga pudungpudong nga mga dahon ug bukad hin aslom ngan imo iginbutang ha akon ulo ngan ginngaranan mo ako nga Cloe;(16) naghimo ka pa hin imo
man, nagkuha ka han mga balagon. Kundi an akon pu dungpudong kinuha ni imo nanay ngan isinakot han balugo(17) pagtultog dida ha bato; nanuro an imo mga luha
ngan nagsiring ka nga hi imo nanay diri nasabot han Mitologia; “Oy, buang!” nagsiring hi imo nanay, “kitaa unina kun diri ba magmahamot iton iyo buhok.” Nahakatawa ako, ikaw nasina, waray ka na ha akon pakighimangraw ngan ha bug-os hadto nga adlaw nagbinuot ka nga pati ako tinuuktuok na la liwat. Han panugbong ta na, tungod kay mapaso an adlaw, nanguha ako hin dahon hin lakdan nga natubo ha ligid han dalan ngan ihinatag ko ha imo basi mo ibutang ha ilarom han imo kalo nga diri ka pagsakitan han ulo. Nahakatawa ka, salit kinaptan ko an imo kamot ngan nagsangkay liwat kita.
Hi Ibarra, duro an kalipay, hinmukad han iya kartera, binuksan ngan didto kinuha in usa nga papel nga nakakaputos hin mag-itom nga mga uga nga dahon.
—An imo dahon hin lakdan! — nganiya pa, — asya la ini an imo ngatanan nahatag ha akon.
Hiya man, an babayi, dinmalidali paghukad didto ha iya dughan hin usa nga suputsupot nga busag nga raso.
—Ps!— baton man niya ngan dinapi an kamot ni Ibarra: — waray saping! Usa ini nga panamilit nga surat.
—An ginsurat ko ito ha imo ugsa ako gumikan?
—Kay may imo iba nga surat ha akon, senyor mio?
—Ano man iton akon dida nahaasoy?
—Mga buwa, mga baribad hin usa nga nakautang nga
