Mga hagtaas nga mga tawo, mga burigo an panagway ngawaray pa hikit’i nga humiyom; an ira mga mata danay manag-inggat kun an Jamba nagpapanlapirit nahapon dida ha ira sugbong, kun pananglit man in usa nga lumalabay napilak ha ira hin usa nga kunot ug mahulushulos pa nga upos pinupurot han nahararani ngan tinatago ha iya takukong;(4) an iba namamagkinita na la hin magtarom nga siplat han iba nga lumalabay. Baga sugad hin nababati pa
ni Ibarra an aringasa han panmuong han mga bato nga itarap-ok han mga bil-ungan nga hagluag, ngan an hinarag-ing han magbug-at nga talikara dida han mga lukunlukon nga nanhuhubag. Hi Ibarra nangingirhat pa panumdom hin usa nga hinabo nga dinmukot gud kaupay ha iya kasingkasing han gutiay pa hiya: usa kaudto nga masirak hin duro. Didto han linilindungan hin usa nga karreton
nahabuburaya in usa nga bilanggo nga haros patay ngan an tuman la nga nakakapukrat han mga mata; may duduha liwat nga waray la aringasa naghihimo hin usa nga higdaan nga kawayan nga may parasgan, waray nira kasina, waray kabido, waray kaikag, asya gud man an siring, kinaiya nga panulos han pilipinhon(5) Baga sugad hin nasiring hira: “Yana ikaw, buwas kami na man.” An mga tawo nagpapanlabay hin waray la kaalantad hadto nga hina bo, magdagmit an kalakat; an kababayin’an nagpapangagi, naniniplat ngadto hin tigdali ngan nagpapadayon han ira lakat; adto nga hinabo masukot, nga dapit nakapahiara na la han mga kasingkasing; an mga kotse nanlalabay maglatos, magsinaw kay mga binarnisan, nasikal didto an naghihingalangaga nga adlaw nga naglalalaga dida han langit nga waray gud dampog; hiya la, gutiay pa, bata nga may napulo kag-usa an panuigon, pag-aabot pa la tikang ha iya bungto, an nangingirhat hadto pagkita, hiya la an ginngarat
hadto nga gab-i.
Waray na didto an maupay ngan dungganan nga tulay Puente de Barcas(6) an pilipinhon ug mainantuson nga tulay nga nagpapakamataymatay hin pagsugot bisan diri hiro an iya kahimo, nga danay mabiyaw ngan danay man lumunod alagad han pagburut’an han Pasig, ngan nakadamo na hini hilangkagi hin pagduyag ngan pagguba.
An mga talisay dida ha plasa San Gabriel(7) waray panubo, mga irapa la gihapon.
An Escolta(8) baga diri na niya mahusay pagkit’on bisan kun may usa nga dako nga balay nga may mga tawutawo
