— Oo, padre! — nagbaton hi Fr. Sibyla dapit nahakakahiyom. — Kundi ito nga aga akon iginkita ug nag siring nga nagbabasol hiya han nahinabo kagab-i, nga an heres daw kuno sinmaka ha iya ulo, ngan an iya isip nga tingali asya man an nasugaran ni P. Damaso. “An imo panarhog nga saad?-’ tiniawan ko hin pagpakiana. “Padre kura,” nganiya pa, “maaram ako magtuman han akon pulong kun ini nga pulong diri nakakadum-it han akon dungog; diri ako ngan waray ako magin-makisusumbungon salit duduha la inin bituon ko ha sugbong”.
Katima nira paghimangraw hin iba pa nga mga lain la an hinpapatungdan , nanamilit hi Fr. Sibyla. An tenyente waray man gud pakadto ha Malakanyang,(5) kundi an Kapitan Heneral nahabaro han hinabo. Flan iginkakahimangraw hiya han iya mga ayudantes mahatungod han paghinabihi ha iya ha mga pahayagan nga urusahon, usa ha ira asya in nagsumat mahatungod kan P. Damaso, ngan dinugangdugangan pa hin pahangit matuod tultol nga kasumat.
—Diin ka man hito hibaro? — nagpakiana an Kapitan Heneral, nahapapahiyom.
—Didto kan Laruja, nga asya an iginsisinumat kanina didto ha panuratan.
An Kapitan Heneral nahakatawa liwat ngan namulong:
—An babayi ngan han prayle diri sadang pag-asahan! Karuyag ko humunong hin mamingaw ha sulod han nasasalin pa nga panahon nga akon ig-uukoy dinhi hini nga tuna, ngan diri ko na buot in kalipungan hin mga tawo nga may saya. Labot pa, hinbaruan ko liwat nga an probinsiyal(6) nagtiaw la han akon mga sugo: pinangaro ko nga pahamaan hito nga prayle nga balhinon ngadto ha lain nga bungto, binalhin man gud, kundi ngadto hin mauruupay; frailadas, siring pa naton didto ha Espanya!
Kundi han nag-uusaan na la hi S. E., waray na hikatawa.
—Ah! kun diri la ini nga bungto uraura hin kalurong, pagpapahimaanon ko unta ini nga mga reberensiyas!
— nagsiring. —Kundi, hayukat han bungto nga sugad; salit subara ta la an binubuhat han iba.
Hadto nga uras hi Kapitan Tiyago katitima pa la ighihimangraw hin'tago kan P. Damaso, karuyag ko sidngon, hi P. Damaso kan Kapitan Tiyago.
