han baras ha salad; ngadto ha unhan nahaligot an salog kay
gin-iipit hin hagtaas nga pangpang nga pinanunukdawan
hin mga lubag nga kahoy nga nan-gagataw an mga gamot;
nganhi dapit, baga inanay an kahulog, nahaluag an salog,
ngan nakukulangan hin sulog. Ngadto ha unhan pa gud,
may usa nga payag nga napunkay ha pangpang, ato han
hangin, han kahitas'an ug han kahiladman han umpas, ngan
tungod kay gagmayay an iya mga harigi(7) haros pakakasidngon nga usa nga gidadakui nga talabong nga nag-iinaw
han halas nga iya tutuktukon. May mga lawas hin anahaw
kun kahoy man nga upakan pa, nga maglubay, nanhahawog ha butnga, nagtatapo tikang ha magkasi pangpang, nga
bisan diri maupay nga tulay mahagagamit nga pangaralab-itayan o latayan han kabataan nga nangangarigos ngan
nakakabaraka hin duro han nalatay nga babayi nga may
tinukdo nga dara, o han tigurang nga nakurog an tuhod
ngan nahuhulugan han iya talugkod ngadto ha tubig.
Kundi an baga nabulang gud ha mata pagkit'on amo in usa nga dapit nadila nga tuna didto ha butnga hadto nga mga kaumhan. May ada didto mga kahoy nga tinaggatos na an panuigon, nga mga lungag an puno, ngan nagkakamamatay la kun didto ha pungkayan hinahapunan hin linti nga say ha ira nasunog: nasiring nga an kalayo naliong la ngan napaparong dida, diri naalapon ngadto han iba; may ada didto gidadagkui nga mga bato nga buhi nga nagkakapuputos na hin tersyopelo nga malunghaw nga lumot: an taputapo nanhihidara ug natitirok didto han ira mga kalungagan, dayon huhumuga han uran basi diri tumabwad ngan katima gintatanman han mga tamsi. An ngatanan nga tumuturok ha kagurangan natubo hin waray makauulang: mga kakahuyan, kabagwakan, kabalagnan nga nagpapahutpahot dida han kakahuyan, namimitay pa ha mga sanga, nan-gugupot ha mga gamot ngan ha tuna, ngan sugad hin diri pa ini igo ni Flora, may naturok pa ha lawas han igkasi tumuturok: an lumot ngan han kurakdot nanunubo ha mga kagihaan han upak; mga manan-aw, iton mga maghusay nga mangarabay nga iginkakalisa han mga dahon han kahoy nga ginuguputan.
Adto nga kagurangan kinatatahaan: may ada mga susumaton nga magpakaharadlok mahatungod hin mga kaagi nga didto nanhinabo; kundi an baga angay la tuuron, nga amo lugod an labi nga diri tinutuod ngan diri hinbabaruan
