Ngan magpadayon hin lakat, tamod an ulo may giniinisip-isip, ngadto an tadong ha daplin han bungto.
—Hapit anay! — ginlabtan hiya hin kinatsila tikang didto hin usa nga tangbuanan.
An pilosopo hinmangad han ulo ngan say niya hinkit'an in usa nga tawo nga may ada na katluan, kun katluan ba kaglima, an panuigon, nga nakikigkatatawa ha iya.
—Ano iton imo ginbabasa? —nagpakiana hi Tasyo, tinutudlok in usa nga basahan nga dinadara ha kamot han tawo didto ha tangbuanan. —Asya in usa nga basahan nga angay hini nga adlaw: Las penas que sufren las benditas animas del Purgagatorio!—(5) binmaton an usa, naghihipahiyom.
—Hombre, hombre, hombre!— namulong an tigurang hin magkalainlain nga tunog han tingog, igo man nga nagtitisaka hiya han balay; —an tagsurat hito angay ko la nga dati kaupay.
Han paghisaka sugaton hiya hin maupay nga kaburut’on han tagbalay ngan han iya bata pa nga asawa. An bana amo hi D. Filipo Lino ngan an iya asawa amo hi Da. Teodora Vina. Hi D. Filipo Tenyente mayor ngan puno hin usa nga hugpo, hugpo nga liberal, kun daw lugaring mahihimo ta hin kangarani hin sugad, ngan kun daw lu garing may ada na hadto mga hugpo didto ha kaburubungtuhan han Pilipinas.
—Iginkita ka didto ha panlubnganan han anak ni D. Rafael, nga pag-aabot pa la tikang ha Europa?
—-Oo, hinkit’an ko nga nahawas dida han iya kotse.
—Nasiring nga nakadto kuno pagbiling han linubngan hadton iya amay . . . Dako gud adto nga kasakit niya han kasayod ....
An pilosopo pinmakuro la han sugbong.
—Ano, diri ka la napaid? — nagpakiana an batan’on nga ginang.
—Sayod ka man nga usa ako han unom nga binmunyog han paglubong; asya ako an inmatubang ha Kapitan Heneral han pag-abat ko nga ngatanan dinhi, pati an mga punuan, waray pananagkiwa mahatungod hadto nga pagbukwata han pinapahuwayan hin murayaw hin usa nga patay, ito ngani nga gabay ako magtahod han maupay nga tawo kun buhi pa, diri ako han patay na.
—Ta, niyan?
