hón tungód sang ila matig-a kag mapasipalahon nga pagbilang
sa mga inanák sang pungsod. Si Basilio walâ sing igù nga
panahon sa pagbukás sang amó nga mga tinangkas; ayhan
nagpugóng man sa iya ang panghunâhonà nga indì maayo ang
magbaton sing isá ka pasipala ukón isá ka pangakig kag wala
siá sing kalalangan sa pagpanagáng ukón pagsabát. Sa pagkamatuod, ang tagsusi, nagpahanugot sang mga pasipala sa
mga pilipinhon apang gindumilian sa ila ang pagsabát.
Sa tungâ sang kalinóng nga naghari sa baláy, nga natublag lamang sang tumalagsa nga gahod nga naghalín sa kaingod nga hulót, nabatián ni Basilio ang mahinay nga mga tikáng sa mga halintang, mga tikáng nga lumaktod sang ulihe sang pasilyo pakadto sa duóg diín siá. Tumongkaaw siá kag nakità niya nga binuksan ang ganhaan kag sa daků niya nga kahanguyós, nagpakità ang masagil-um nga dagway sang manogalahás nga si Simoun..
Kutob sang nagkahanabò sa San Diego, si Simoun walâ na magbalik sa pagtan-aw bisán sa pamatan-on ukón kay Kapitán Tiago.
— Maanuano ang masakitón? Pamangkot niya nga nagpilák sing maabtik nga pasiplat sa sulód sang hulót kag tinulok niya ang mga tinangkas nga aton nasambit, nga ang iya mga pamihák wala pa malihapi.
— Ang mga pitík sang iya tagipusuon, indi mabatián... ang pulso mabinay kaayo... ang gana sa pagkaon, nadulà tanán. - sabát ni Basilio nga nagyuhóm sing masulub-on kag sa mahinay nga tingog. - Ginabalhas-bahulay siá sa kaagahon...
Kag sang makità niya si Simoun, nga ang iya nawóng natumod sa sinambit nga mga tinangkas kag hinadlukán siá nga balikon niya ang paghambal nahanungód sang butang nga ginhambalán nila sa talon, nagpadayon siá:
— Ang iya kalawasan nalatum na sang hilu; karón ukón bwás saráng siá mapatáy subong sang hinapit sang linti... ang labíng diutay nga kabangdanan, butáng nga walâ sing anó kag anó isá ka kibót saráng makapatay sa iya...
— Subong sang Filipinas! Tugdà nga may kahanuklog ni Simoun.
