10
siyagit...
Hubóg, buang, kun unsa, kadtong tawohana, makita tá inígkilat, nga batán-on pa ug maambong; apán nianang kabatan-on ug kaambong nga sayóng mangalawos, tungud kay sa kasingkasing ug kalag, nagagilísgilís sa dakung kapintas ang unós sa kasakit.
"Ayaw kamóg kasubó—nakanayon siyá.—Ang inyong kamatayon, makakaplag gayud sa ilang panimalús. Akó dili unta bu-ot sa gubat; apan kay walá tagda sa mga may katungud ang akong tingog; ug tungud kay ang mga kalapasan karón hilabihán na uyamut, kinahanglan, kinahanglan nga ang katarungan, ang silot sa mga makasasala, adto ko na pangita-a sa gubat. ¡Salig kamó lamang! Kamó ug si Sidíng adunay usá ka mapintas nga magbabalus."
Nagadugáng ang pagkusóg sa ulán, walá magapu-as ang dalógdog ug kilat, milabí ang unús; apan kadtong batan-on, sa waláy bisan diyutayng kahadlok ug pagtagád sa kahimtang sa Kina-iyá, nagapadayon pagtindog, daw nakigsulti sa mga minatáy didto sa lúbnganan.
¿Kinsa kadto siyá? ¿Kinsa kadtong nangamatay? ¿Kinsa si Sidíng nga iyang gingánlan?
Kining sugilanon, kung dili mo ikalaay ang pagbasa, mao kanimoy motubág.
