TAḊG SAOR.
Dráma aoin ġníṁ, dráma suilt.
An ḟuirean.
| Taḋg Saor. | Sagart. |
| Duine uasal iasaċta. | Crost (buaċail sráide). |
| Bean Ṫaiḋg. | Bás (buaċail sráide). |
| Nóra (cailín an tiġe). | Beirt luċt airm. |
| Doċtúir. | Cailíní agus buaċailí. |
AN ĊÉAD NOĊTAḊ.
Amuiġ ar ṡráid.
Duine uasal iasaċta.—Dia ’s Muire ḋuit-se.
Bás.—Dia ’s Muire ḋuit, a’s Pádraig, a ḋuine uasail.
D. I.—Náċ é seo sráid Maġ Ċromṫa agam?
Bás.—Ambasa aċ isé, a ḋuine uasail. An fada ṫánaís?
D. I.—Nár ċóir gur ċuma ḋuit! Náċ éaċtaċ an obair ná féadfaiḋ duine teaċt isteaċ i sráid iasaċta gan gaċ aon dailtín a ḃuailfiḋ uime ḃeiṫ ’ġá ḟíafraiġe ḋe an fada ṫáiniḋ sé! Ní’l duine a ḃuail umam ó ṫánag nár ċuir ceisd éigin de’n tsórd san orm.
Bás.—Gaḃaim párdún agat, a ḋuine uasail. Níor ċuireas-sa ceisd ort go dtí gur ċuiris féin ceisd ormsa ar dtúis. Ċeapas nár ḃ’ ḟoláir nó ṫánaís tamal maiṫ ó ḃaile agus a ráḋ ná raiḃ ainim na sráide seo agat.
D. I.—Tá a h-ainim anois agam. An ḃfuil fear ’n-a ċoṁnuiġe sa tsráid seo gur ḃ’ainim dó Taḋg Saor?
Bás.—Ambasa féin tá, a ḋuine uasail. Cad dob áil leat dé?
D. I.—Féuċ airís! Airiú greadaḋ ċúgaiḃ, a ṡloigisg ḋroċ ṁúinte! Ar ṫugḃúir riaṁ eólus do ḋuine gan ḃeiṫ ag ceisdiúġċán air?
Bás.—’Sdó feuċ anois, a ḋuine uasail, is tusa atá ag ceisdiúġċán ormsa.
[Tig Crost.]
Crost.—Éist do ḃeul, a ḃligáird, agus ná bí ag taḃairt gaċ ré seaḋ do’n duine uasal. Cad é seo ort, a ḋuine uasail? Ná bac an breallán san. Ní’l aon ċial aige. Imṫig leat féin as so!
