[᭓᭔ 34B]
᭓᭔
ᬫ᭄ᬩᬶᬩᭂᬦ᭄ᬢᬶᬂ᭞ᬓᬬᬸᬦᬾᬓ᭄ᬦᬵ᭞ᬋᬫᬸᬓ᭄ᬫᬦᬤᬶᬳᬧᬶ᭟᭜᭟ᬬᬫ᭄ᬩᬃᬓᬯᬶᬫ᭄ᬦᬾᬓ᭄ᬤᬶᬓᬬᬸᬦᬾᬳᬾᬗ᭄ᬕᬮ᭄᭞ᬫᬾᬮᬶᬂᬭᬶᬂᬳᬮᬶᬳᬮᬶ᭞ᬭᬭᬶᬲ᭄ᬓᬩᬸᬗ᭄ᬓᬸᬗᬂ᭞ᬤᬤᬶᬢ᭄ᬯᬭᬵᬳᭂᬦᭀᬢ᭞ᬩᬳᬦ᭄ᬭᬓ᭄ᬱᬲᬦᬾᬲᬫᬶ᭞ᬲᬶᬂᬢ᭄ᬓᬓ᭄ᬫᬵ᭞ᬓᬩᭀᬗ᭄ᬓᭀᬮ᭄ᬓᬬᬸᬦᬾᬕ᭄ᬮᬶᬲ᭄᭟᭜᭟ᬳᬶᬬᬫ᭄ᬩᬃᬓᬯᬶᬚᬦᬶᬫᬗᭂᬮᬾᬩᬂᬢᬶᬫ᭄ᬧᬲ᭄᭞ᬲᬶᬂ
ᬢ᭄ᬓᬓ᭄ᬫᬫᬢᬶ᭞ᬓᬲᬦ᭄ᬤᭂᬃᬩᬦ᭄ᬢᬶᬫ᭄ᬧᬲ᭄᭞ᬤᬤᬶᬩ᭄ᬗᭀᬂᬳᬶᬤᬾᬢ᭄ᬬ᭞ᬮᬦ᭄ᬢᬲ᭄ᬤᬶᬢᬸᬫᬗ᭄ᬮᬶᬬᬢᬶᬦ᭄᭞ᬗᬶᬂᬢ᭄ᬯᬭᬵᬳᬤᬵ᭞ᬚᬤ᭄ᬫᬵᬳᬗᬦ᭄ᬳᬲᬶᬓᬶ᭟᭜᭟ᬓᬾᬯᬮᬳᬲᬶᬂᬓ᭄ᬓᬶᬸᬓ᭄ᬫᬢ᭄ᬓᬧ᭄ᬭᬕᬢ᭄᭞ᬳᬤᬵᬫᬜᬕ᭄ᬚᬕᬶᬦ᭄᭞ᬓ᭄ᬫᬳᬫ᭄ᬤᬲᬂ᭞ᬤᬶᬚᬲᬶᬢᭀᬗᭀᬲ᭄ᬚᬤ᭄ᬫᬵ᭞ᬓᬾᬯᬮᬭᬱᬜᬤᬶᬦᬶ᭞ᬭᬭᬶᬲ᭄ᬳᬶᬢᬶᬫ᭄ᬧᬲ᭄᭞ᬩᬸᬯᬶ
ᬦ᭄ᬫᬜᬦ᭄ᬤᭂᬃᬘᬤᬶᬓ᭄᭟᭜᭟ᬫᬗᬮᬾᬦ᭄ᬢᬾᬂᬘᬤᬶᬓ᭄ᬜᬦᬾᬫᬕ᭄ᬮᬬᬸᬢᬦ᭄᭞ᬧᬢᬶᬧᬸᬳᬸᬓ᭄ᬫᬮᬳᬶᬩ᭄᭞ᬬᬫ᭄ᬩᬃᬓᬯᬶᬗᬓᬓ᭄᭞ᬬᬓ᭄ᬤᬾᬓ᭄ᬧᬤᬶᬤᬶᬬᬦ᭄᭞ᬭᬓ᭄ᬱᬲᬦᬾᬩᬸᬯᬶᬦ᭄ᬩ᭄ᬭᬗ᭄ᬢᬶ᭞ᬩᬦᬾᬦᬶᬗᭂᬳᬂ᭞ᬚᬤ᭄ᬫᬵᬓ᭄ᬤᬾᬓ᭄ᬧᬤᬶᬤᬶ᭟᭜᭟ᬳᬶᬭᬓ᭄ᬱᬲᬚᬦᬶᬳᬶᬬᬩ᭄ᬯᬶᬦ᭄ᬫᬜᬕ᭄ᬚᬕ᭄᭞ᬫᬩᬶᬓᬲ᭄ᬫᬗᬮᬶᬳᬶᬦ᭄᭞ᬫᬚᬮ
ᬦ᭄ᬫᬶᬍᬳᬦ᭄᭞ᬩᭀᬗ᭄ᬓᭀᬮ᭄ᬓᬬᬸᬦᬾᬓᬯᬲ᭄᭞ᬢᬶᬫ᭄ᬧᬲᬾᬫᬜᬦ᭄ᬤᭂᬃᬓᬸᬧᬶᬂ᭞ᬫᬯᬦᬦ᭄ᬧ᭄ᬕᬢ᭄᭞ᬧᬢᬶᬓ᭄ᬧᬸᬕ᭄ᬬᬫᬮᬳᬶᬩ᭄᭟᭜᭟ᬳᬶᬭᬓ᭄ᬱᬲᬚᬦᬶᬫᬫᬸᬜᬶᬗ᭄ᬭᬓ᭄᭞ᬧᬳᭂᬓ᭄ᬱᬦ᭄ᬩᭀᬜᬤᬶᬦᬶ᭞ᬮᬦ᭄ᬮᬲ᭄ᬬᬲᬦ᭄ᬤᭂᬭ᭞ᬘᬸᬗᬸᬳᬾᬩᭀᬗ᭄ᬓᬾᬂᬳᬶᬮᬂ᭞ᬧᬓᬸᬤᬾᬫ᭄ᬧ᭄ᬮᬗᬦ᭄ᬫᬮᬳᬶᬩ᭄᭞ᬬᬧᬢᬶᬩᬩᬃ
[᭓᭕ 35A]
᭓᭕
᭞ᬫᬮᬳᬶᬩ᭄ᬤᬶᬗ᭄ᬓ᭄ᬭᬶᬓ᭄ᬤᬶᬗ᭄ᬓ᭄ᬭᬶᬓ᭄᭟᭜᭟ᬬᬫ᭄ᬩᬃᬓᬯᬶᬓ᭄ᬤᬾᬓ᭄ᬢᭀᬂᬤᬤᬶᬳᬦ᭄ᬤᭂᬕ᭞ᬳᭂᬗ᭄ᬓᭂᬮ᭄ᬓᭂᬤᬾᬓ᭄ᬧᬤᬶᬤᬶ᭞ᬫᬗᭂᬦᭀᬢ᭄ᬭᬓ᭄ᬱᬲ᭞ᬩᬦ᭄ᬘᬸᬗᬸᬄᬜᬦᬾᬳᬶᬮᬂ᭞ᬳᬗ᭄ᬓᭂᬩᭀᬩᬜᬫᬮᬳᬶᬩ᭄᭞ᬬᬧᬢᬶᬩᬩᬃ᭞ᬲᬶᬂᬩᬩᬭᬓᬮᬮᬶᬄ᭟᭜᭟ᬧᬤᬵᬗᬸᬗ᭄ᬲᬶᬧᬸᬭᬶᬦ᭄ᬳᬶᬤᬵᬦᬾᬲᬂᬦᬖ᭄ᬕ᭞ᬧᬦ᭄ᬳᬶᬤᬵᬓᬗ᭄ᬕᭀᬕᬸᬲ᭄ᬢᬶ᭞
ᬳᬚᬓᬫᬓ᭄ᬚᬂ᭞ᬲᬮᬶᬬᬸᬦ᭄ᬤᬕᬶᬂᬳᬮᬲ᭄᭞ᬲᬂᬗᬦ᭄ᬢᬵᬪᭀᬖ᭄ᬕᬦᭂᬫᭀᬦᬶᬦ᭄᭞ᬲ᭄ᬤᭂᬓ᭄ᬤᬶᬚᬩ᭞ᬳᬶᬗᬶᬦ᭄ᬢᬾᬤᬶᬢᬸᬦᬗ᭄ᬓᬶᬮ᭄᭟᭜᭟ᬦᬵᬖ᭄ᬕᬕᬶᬡ᭄ᬦᬶᬲ᭄ᬤᭂᬓ᭄ᬩᬋᬂᬫᬗ᭄ᬭᬯᭀᬲᬂ᭞ᬳᬶᬤᬵᬭᬳᬤᬾᬦ᭄ᬫᬦ᭄ᬢ᭄ᬭᬶ᭞ᬩᬦᬾᬫᬓ᭄ᬮᭀᬲᬦ᭄᭞ᬫᬲᬶᬄᬢ᭄ᬯᬭᬤᬵᬢ᭄ᬓᬵ᭞ᬳᬶᬗᭂᬫ᭄ᬩᬦ᭄ᬲᬸᬩᬦ᭄ᬤᬬᬦᬶᬦ᭄᭞ᬢ᭄ᬯᬄᬳᬶᬤᬵᬲᬾᬤ᭞ᬦᬶᬗᬶᬦ᭄ᬢᬾᬭᬭᬶ
ᬲ᭄ᬦᬗᬶᬲ᭄᭟᭜᭟ᬲᬗᬵᬦ᭄ᬢᬵᬪᭀᬕ᭄ᬕᬭᬭᬶᬲ᭄ᬳᬶᬤᬵᬗᬦ᭄ᬤᬶᬓ᭞ᬫᬗᬸᬤᬜᬳᬶᬗ᭄ᬮᬶᬂ᭞ᬫᬗᬸᬤᬲ᭄ᬤᬶᬄᬲᬦ᭄᭞ᬦᬾᬫᬦᬶᬤᭀᬗᬢ᭄ᬓ᭞ᬤᬢᬚᬲ᭄ᬤᬶᬳᬂᬜᬳᬶ᭞ᬲᬕᬾᬢ᭄ᬓᬮᬗᬦ᭄᭞ᬭᬓ᭄ᬱᬲᬢ᭄ᬓᬧᬚ᭄ᬭᬶᬢ᭄᭟᭜᭟ᬤᬤᬶᬓᬕ᭄ᬬᬢ᭄ᬳᬶᬗᭂᬫ᭄ᬩᬦ᭄ᬫᬮᬳᬶᬩ᭄ᬫᬸᬮᬶᬳᬦ᭄᭞ᬲᬶᬲᬸᬗᬸᬩᭂᬢᬂᬓᭀᬭᬶ᭞ᬭᬓ᭄ᬱᬲᬦᬾᬢ᭄ᬓ᭞ᬧᬋᬓ᭄ᬲᬂᬗᬵ
ᬦ᭄ᬢᬪᭀᬕ᭄ᬕᬵ᭞ᬧᬕᬭᬸᬩᬸᬕ᭄ᬤᬶᬳᬶᬲ᭄ᬤᬶᬳᬶᬲ᭄᭞ᬳᬤᬵᬦᬂᬲᬫᬲ᭄᭞ᬫᬢᬢᬸᬮᬶᬬᬸᬫᬢᬶ᭟᭜᭟ᬳᬤᬵᬳᭂᬮᬸᬂᬍᬗᭂᬦ᭄ᬜᬦᬾᬫᬢᬬᬸᬗᬦ᭄᭞ᬳᬤᬵᬫᬢᬢᬸᬩᬢᬶᬲ᭄᭞ᬮᬾᬦ᭄ᬮᬶᬫᬦ᭄ᬜᬧ᭄ᬕᬢ᭄᭞ᬳᬤᬵᬢ᭄ᬓᬢᬦ᭄ᬧᬓᬸᬧᬶᬂᬧ᭄ᬕᬢ᭄᭞ᬳᬤᬵᬦᬕᬶᬄᬳᬾᬗ᭄ᬕᬮ᭄ᬫᬢᬶ᭞ᬮᬾᬦ᭄ᬳᬤᬵᬢ᭄ᬓ᭞ᬢ᭄ᬯᬭᬵᬫᬗ᭄ᬮᬄᬘᬤᬶᬓ᭄᭟᭜᭟
