[᭑᭙ 19B]
᭑᭙
ᬲᬬᬦ᭄ᬫᬕᭂᬦ᭄ᬢᬶ᭞ᬢᬸᬃᬫᭂᬮᬄᬫᬓᬦ᭄᭞ᬰᬭᬨᬾᬢᭀᬦ᭄ᬤᬾᬦ᭄ᬫᬯᬮᬶ᭟᭐᭟ᬫᬭᬢᭂᬓᭂᬤ᭄ᬩᬸᬯᬶᬦ᭄ᬚᬸᬫᬄ᭞ᬤᬶᬅᬫ᭄ᬮᬧᬸᬭᬚᭂᬦᭂᬓ᭄ᬫᬮᬶᬄᬫᬯᬮᬶ᭞ᬗᭂᬦᬳᬸᬫᬄᬲᭂᬧᬶᬫᬂᬫᬸᬂ᭞ᬫᬶᬭᬶᬩ᭄ᬲᬶᬂᬳᬤᬵᬩ᭄ᬭᬸᬗᬸᬯᬂ᭞ᬧᬸᬜᬦ᭄ᬩᬸ᭠
ᬗ᭄ᬳᬵᬧᬤᬗᬾᬧᬤᬗᬋᬫ᭄ᬩᬸᬦ᭄᭞ᬓᬸᬮᬸᬓᬾᬲᬶᬂᬧᬢᬶᬗᬫᬄ᭞ᬲᭂᬩᭂᬢ᭄ᬫᬓᭂᬮᭀᬓᬮᬳᬶᬦ᭄᭟ᬲᭂᬫᭂᬂᬫ᭠ᬳᬸᬭᬸᬓ᭄ᬫᬚᬮᬦ᭄᭞ᬤᬶᬗᭂᬄᬫᬸᬜᬶᬦ᭄ᬪᬭᬸᬓ᭄ᬘᬸᬓᬾᬫᬗᬸᬘᬶ᭞ᬓᭂᬤᬶᬲ᭄ᬓᬸᬓᬹᬃᬘᭂᬓᬹᬃᬘᭂᬓᬹᬃ᭞ᬲᬲᬧᬶᬦᬾᬲᭂᬭᬩ᭄ᬗᬶᬫ᭄ᬩᬂ᭞ᬩᬸ
ᬗ᭄ᬳᬵᬕᬫ᭄ᬩᬶᬃᬲᬤᬵᬫᬶᬬᬶᬓᬮᬸᬩ᭄ᬳᬮᬸᬩ᭄᭞ᬫᬶᬭᬶᬩ᭄ᬧᬥᬬᬵᬕᬃᬕ᭄ᬕᬶᬢ᭞ᬜᬫ᭄ᬪ᭄ᬭᬫᬤᬾᬯᬾᬓᬾᬫᬸᬮᬶᬄ᭟ᬩᬸᬗ᭄ᬳᬵᬳᬗ᭄ᬕ᭄ᬭᬾᬓᬾᬫᬓᭂᬚᬂ᭞ᬓᭂᬫ᭄ᬩᬂᬳᬶᬬᬲ᭄ᬮᬸᬫ᭄ᬮᬸᬫ᭄ᬬᬵᬫᬲᭂᬩᭂᬂᬓᭂᬜᬶᬂ᭞ᬫᬜᬧᬲᬂᬯᬯᬸᬭᬯᬸᬄ᭞ᬢᬶᬫ᭄ᬧᬮᬾ᭠
ᬢᭂᬓᬫᬤ᭄ᬮᭀᬓᬦ᭄᭞ᬤᬵᬬᬸᬲᬸᬘᬶᬳᬶᬤᬯᬬᬦ᭄ᬚ᭄ᬮᬡ᭄ᬝᬶᬓ᭄ᬭᬯᬸᬄ᭞ᬧᬓ᭄ᬳᬸᬲᬦ᭄ᬦᬾᬫᬸᬮᬤᬩ᭄ᬤᬩ᭄᭞ᬕᬸᬲ᭄ᬭᬳᬶᬢᬦ᭄ᬲᬄᬗ᭄ᬭᬯᬸᬳᬶᬦ᭄᭟ᬓᬢᬸᬗ᭄ᬓᬸᬮ᭄ᬳᬶᬥᭂᬧᬾᬮᬶᬬᬂ᭞ᬫᬵᬧᬦᭂᬦ᭄ᬢᭀᬜ᭄ᬮᬶᬫᬸᬭᬂᬓᭂᬦᭂᬳᬾᬧᬮᬶᬂ᭞ᬦᬶᬗᭂᬄ
[᭒᭐ 20A]
ᬫᬸᬜᬶᬫᬦᬶᬲ᭄ᬋᬫ᭄ᬧᬸᬄ᭞ᬤᬵᬬᬸᬲᬸᬘᬶᬫᬦᭂᬫ᭄ᬩᬗᬂ᭞ᬕᬕᬸᬭᬶᬢᬦ᭄ᬤᬸᬕᬲ᭄ᬲᬓᬶᬢᬾᬤᬶᬩᬤᬸᬂ᭞ᬢᭂᬫ᭄ᬩᬗᬾᬫ᭠ᬫ᭄ᬮᬤ᭄ᬧ᭄ᬭᬡ᭞ᬕᬸᬲ᭄ᬭᬳᬶᬦᬾᬗᬼᬗ᭄ᬓᬭᬳᬶᬦ᭄᭟ᬮᬶᬬᬂᬳᬶᬥᭂᬧᬾᬳᬸᬘᬧᬂ᭞ᬯᬮᬸᬬᬵᬫᬓ᭄ᬚᬂᬢᬶᬫ᭄ᬧᬮᬾᬗᬸᬩᬤᬶᬦ᭄᭞
ᬤᬤᬶᬲᬬᬦ᭄ᬲᬬᬦ᭄ᬫᬵᬫ᭄ᬧᬸᬄ᭞ᬤᬸᬮᬸᬭᬶᬦ᭄ᬓᭂᬦᭂᬳᬾᬳᬾᬕᬃ᭞ᬲᬹᬓ᭄ᬱ᭄ᬫᬦ᭄ᬫᬦᬳᬾᬤᬤᬶᬫᬶᬮᬸᬓᬧᬶᬢᬸᬢ᭄᭞ᬤ᭠ᬤᬶᬮᬫ᭄ᬩᬂᬚ᭄ᬭᭀᬦᬶᬂᬓᬭᬲ᭄᭞ᬕᬸᬭᬶᬢ᭄ᬳᬸᬗ᭄ᬕᬳᬂᬧᬗᬯᬶ᭟ᬲ᭄ᬯᬾᬘ᭄ᬙᬦ᭄ᬯᬶᬥᬶᬦᬾᬲᬹᬓ᭄ᬱ᭄ᬫᬬᬂ᭞ᬳᬤᬕᬮᬄᬦᬩ᭄ᬤᬩᬂᬢᬫᬦᬾ᭠
ᬳᬰ᭄ᬭᬶ᭞ᬗᬯᬾᬢ᭄ᬮᬕᬫᬶᬲᬶᬢᬸᬜ᭄ᬚᬸᬂ᭞ᬪᬶᬭᬸᬧᬸᬢᬶᬄᬢᬸᬃᬦᬾᬩᬭᬓ᭄᭞ᬤᬶᬩᭂᬢᬾᬦ᭄ᬘᬵᬫ᭄ᬧᬓᬓᬸᬦᬶᬗᬾᬦᬾᬗᬮᬸᬩ᭄᭞ᬫᬶᬲᬶᬢᭀᬕᭀᬕ᭄ᬦᬾᬫᬧᬶᬡ᭄ᬥ᭞ᬳᬶᬓᬓᬶᬯᬸᬯᬫᬫᬜ᭄ᬘᬶᬂ᭟ᬤᬶᬲᬶᬲᬶᬦ᭄ᬢ᭄ᬮᬕᬳᬶᬬᬲ᭄᭞ᬧᬸᬜᬦ᭄ᬩᬸᬗ᭄ᬳᬵ᭠
ᬓᭂᬫ᭄ᬩᬂᬳᬕᬸᬯᬃᬡ᭄ᬦᬯᬃᬡ᭄ᬦᬶ᭞ᬳᬤᬩᬭᬓ᭄ᬤᬤᬸᬮᬸᬫ᭄ᬮᬸᬫ᭄᭞ᬧᭂᬮᬸᬂᬓᬸᬦᬶᬂᬧᬥᬓᭂᬫ᭄ᬩᬂ᭞ᬳᬤᬩᬸᬯᬶᬦ᭄ᬢᭀᬕᭀᬕ᭄ᬳᬦᬓ᭄ᬘᭂᬦᬶᬓ᭄ᬫᬜᬸᬄ᭞ᬬᬾᬄᬦᬾᬗᭂᬲᭀᬃᬲᬶᬤᬵᬢᭂᬮᬕ᭄᭞ᬳᬶᬭᬭᬾᬳᬗᭀᬧᬶᬸᬦ᭄ᬧᬵᬲᬶᬳᬶᬦ᭄᭟᭐᭟
Page:Bali-lontar-gaguritan-ligya-patibrata-300ppi.pdf/20
This page has been proofread.
