—¡A! no addata kuma ita idiay balay tayo, iti arpad ni ina! —inyasog daydi inaudi, a kinitana ti kabsatna; —sadiay diak knma mabuteng.
Ti inauna saan a simmungbat; kitkitaenna no kasano ti panagtedted ti allid ti kandela ket kas la adda panpanunutenna.
—¡Sadiay, awan agkunkuna nga agtaktakawak! —innayon ni Crispin; —!saan kuma nga ipalubos ni ina! No ammuna la kuma a kabkabilendak...
Ti inauna insinana dagiti matmatana iti silaw, intangadna ti ulona, kinagatna a sipipigsa daydi dakkel a tali a ginuyudna met iti napigsa, ket adda nangngeg a natbag nga aweng.
—¿Kanayon la a kastoy ti panagbiag tayon, kaka? —intuloy ni Crispin ti nagsao. — ¡Kayatko kuma ti agsakit no bigat idiay balay, kayatko kuma ti agsakit iti mabayag tapno bantayannak ni ina ket dinak pagsubsublien iti konbento! Iti kasta, saan dakto a nagnaganen birkog, ket didak met kabkabilen!
—¡Saan! —insungbat ti inauna; — mataytayto amin: ni ina, iti tuok; ket data iti bisin. Ni Crispin saan a simmungbat.
—¿Mano ti maulluam iti day toy a bulan? —sinaludsudna kalpasan ti bassit a kanito.
—Dua a pisos: namitlo a minultadak.
—¡Bayadam kad ti kunada a tinakawko, tapno di datay nagnaganen birkog; bayadam kadi, kaka!
—¿Agmauyungka, Crispin? ¡Awanton a ti kanen ni ina!; ti sakristan mayor kunana a dua nga onsa ti tinakawmo, ket ti dua nga onsa, tallo pulo ket dua a pisos ti bayadna.
Ti inaudi nagrupis kadagiti ramramayna inggana iti nakabilang iti tallo pulo ket dua.
—¡Innem a im-ima ken dua a ram-ramay! Ket tunggal ramay, maysa a pisos, — sana indayamudom a sipapanunot. —Ket ti maysa a pisos... mano a kuarta?
—Sangagasot ket innem a pulo.
—¿Sangagasot ket innem a pulo a kuarta? ¿Sangagasot ket innem a pulo a kuarta? ¡Ina! Ket ¿mano dayta sangagasot ket innem a pulo?
—Tallo pulo ket dua nga im-ima, —insungbat ti inauna.
