Daydi ubing saan a umanges: sitatakder a umal-allingag, dagiti
matmatana kasta unay a mulagatda ket dagidi im-imana sipepetpetda.
-Kaanunto ngata ti pannakabaelko nga agarado iti daga?— kinunana nga inngariet ket immulog a nagdardaras.
Idi nakagteng iti koro, immallingag a naimbag: ti timek ti adina umad-adayo a sipapardas ket ti pukkaw a kunkunana: ina! kakal nagpukaw a naminpinsan idi adda naripkan a ruangan. Agpigpigerger, aglinglinget, nagsardeng biit; kinagatna ti gemgemna a pinanglemmesna iti rnaysa nga ikkis nga aggapo iti pusona ket inwarasna ti panagkitana iti panipngeten a uneg ti simbaan. Sadiay, sisesegged a sikakapoy ti pagsilawan a lana; ti tumba adda iti tengnga; dagiti ruruangan siririkepda amin, ket dagiti tawtawa adda rejas da.
Pagammuanen, immuli iti agdan, linabasanna ti maikadua a tukad a yan a sumsumged ti kandela ket immuli iti maikatlo. Winar-warna dagiti taitali a singdan dagiti pagpatit kadagiti kamkampana, sa nagsubli nga immulog a sibebessag, dagiti matmatana sumilsilapda, ngem saan a gapo kadagiti luluana.
Ti tudo iti daydi, mangrugi a sumardeng ket ti langit mangininot nga aglawag.
Ni Basilio siniglusiglutna dagiti taitali, inggalutna ti maysa a murdong iti maysa kadagiti kadkadang ti pagkampanaan, ket nagalus-os iti let-ang ti sipnget a dina pay ket nalagipen a iniddep ti silaw.
Kalpasan ti sumagmamano a kanito, adda nangngeg a timek ti tao ken dua nga uni ti paltog iti maysa kadagiti lanlansangan ti ili; ngem awan nagriaw, ket nagsubli man met langen ti ulimek.
