nakaaramidna nga estampa, a ti silawna, maysa la a timsim, wenno kayatyo ket di dagiti dadakkel a kankandela iti sango dagiti Kristo
nga agdardara, dagiti Santa María a babassit ti ngiwat da ket sarming dagiti matmatada, dagiti mismisa a sao ti latín, nga aramiden a sipapardas ti padi? Ket sika, Relijión a naikasaba kadagiti amin a tattao nga agsagsagaba, ¿nalipatam kadin ti annóng mo a mangliwliwa iti maimameg iti kinamarigrigatna, ken mamagpakumbaba iti mannakabalin iti kinatangsitna, ket ita, isuna la nga ammumon
a ikarian dagiti babaknang, dagiti makabalin a mangbayad kenka?
Ti nakakaasi a balo agpuyat iti yan dagiti annakna a matmaturog iti arpadna; panpanunutenna dagiti bulbula a rebbengna a gatangen tapno indan aginana dagiti nagan-annak kenkuana ken ti natay nga asawana. “Ti maysa a pisos,” kunana, “ti maysa a pisos, maysa a lawasna nga ay-ayat kadagiti annakko, maysa a lawasna a katkatawa ken ragragsak, iso ti maur-urnong ko iti makabulan, maysa nga aruaten toy anakko nga bumalasangen...” — “Ngem masapol a sebsebam dagitoy nga ap-apoy.” Kuna ti timek a nangngegna a nangasaba; “masapol nga agrigatka.” ¡Wen! masapoli Ti Simbaan saanna nga aunen nga awan bayadna dagiti karka rarua dagiti ay-ayatem; saanna nga ibunong dagiti bulbula nga awan bayadna. Rebbengmo a gatangen, ket saan ka a maturog iti rabii, ngem agbannugka ket di. Dayta balasang mo, uray no ipak-pakitana pay laeng dagiti saanna kuma a rebbeng a ipakitan; agayunarka, saanka a mangmangan, ta ti langit nangina! Kas la nalpasen a dagiti napanglaw saanda a sumbrek sadi langit!
Dagitoy a panpanunot umap-appayawda iti nagbaetan ti basar a nakayaplagan ti nakurapay a ikamen, ken ti sekkeg a nakaibitinan ti indayon a yan ti ubing. Ti panagangesna nalaka ket nainayad; pasarayna galgalen ti katayna ket pasaray met aguni; dardarepdepenna ti pannangan ti sibibisin a buksit a saan a mapnek piman iti inted dagiti kakkakana.
Dagiti kukundidit agun-unida itay riari da a makauma, awan patinggana, agkakanayon, a mailaok iti uni ti kuriat, a silelemmeng iti karuutan, wenno iti uni ti abbot a rumuar iti abotna, a mapan agsapol iti taraonna, ket ti met tekka, ta awanen danom a kabutengna, dadaelenna ti danggay dagidiay iti nakabutbuteng a unina ket inna itammidaw ti ulona iti lungog ti kayo a nakungkungan. Dagiti as-aso agtatagu-ubda iti dalan, ket ti managabusion
