a lawag: iti natarnaw a balbagna addada agkalkallutang a babassit a ul-ulep a napudaw. Nagsardeng tapno inna mapedped
ti panagpigerger ti amin a bagina.
Dagidi sosoldado pinanawanda ti balay ket is-isuda laeng: awan sabali a tiniliwda no dila daydi kakaisuna a pamusian a palpalukmegen ni Sisa. Immanges ket timmured.
—¡Nagimbagdan ket nagsayaat ket ti panagpuspusodan! — indayamudumna nga uray la nakasangit iti ragsakna.
Uray kuman pinuuran dagiti soldado ti balayna, no pinalusutanda la ket dagiti annakna, inna pay la kuma ida pinaglablabon iti panagyaman.
Kinitana manen a si-iyaman ti langit, a nairana a linasat ti sangapangen a kannaway, dagitay nalag-an a ul-ulep ti langit sadi Pilipinas, ket intuluyna iti nagna, a rimmusing manen ni talek iti pusona.
Idi makaasideg kadagiti nakabutbuteng a tattao, ni Sisa naginkikita iti amin a di mangan-ano a kas la mailiwliwag, ket kas itay dina nakita daydi manokna, nga agkikiak a kas la dumawdawat iti saranay. Apaman a nakalabas iti yanda, kinayatna ti nagtaray, ngem ni annad iso ti nanerred kadagiti saksakana.
Saan pay unay a nakaadayo idi nangnegna nga ayabanda iti nakaturturay a timek. Nagkintayeg, ngem kas la itay dina nangngeg ket intuluyna ti nagna. Sinublianda nga inawagan, ngem itan pinukkawanda ket pinasarunuanda iti dakes a sao. Nupay kasano a rigatna, timmaliaw a kasta unay a bessag ken tigergerna. Daydi maysa a sibil inna paypayapayan.
Immasideg ni Sisa a kas la dina napuutan, ket nariknana a ti dilana saan a makagaraw iti kigtot ket ti karabukobna nagmaga.
—¡Ibagam kadakami ti pudno, tano saan, igalutdaka iti daydiay a kayo, sa daka paltugan ti mamindua!—kinuna ti maysa kadakuada, a timekna ti nakaam-ames.
Daydi babai kinitana daydi kayo.
—¿Sika ti ina dagitay agtaktakaw?, ¿sika? —sinaludsod daydi maysa.
—¡Ina dagiti agtaktakaw! —inulit ni Sisa a dina napuutan.
—¿Adinno ti yan ti pirak a inyeg kenka dagiti annakmo idi
rabii?
— 149 —
