ipakdaarda a nalpasen ti maudi a nisa. Ni Sisa kinartinganna ti
nagna, tapno saan la kuma a masabat, no mabalin, dagiti tattao
nga agruar. Ngem, !banbannog! awan pamuspusan a manglisi
iti pannakasabatna kadakuada.
Kinablaawanna a siisem iti napait ti dua a babbai nga amammuna, nga inda nagintu-udan kadagiti matmatada, ket idi kuan, tapno malisianna dagidi a pagpagel, inna indumog ti ulona ket isuna la nga inna kinita ti daga, !ket nakaddidillaw! !maitigkutigkol kadagiti batbato iti daian!
Dagiti tattao sumardengda iti apagbiit, no inda makita, agkikinnissimda a surutenda kadagiti matmatada: amin dagitoy inna piman makita, inna marikna, numan pay kanayon a sibababa dagiti matmatana.
Adda nangngegna a naawanan bain a timek ti maysa a babai a nagsaludsod iti likudanna, nga istayna pay inyuriag:
Adinno ti nakatiliwanyo? Ket tay pirak?
Maysa daydi a babai a saan a nagbidang, nakapandiling iti kiao ken naganos ket nakabado iti narasay a balbag; mabalin a mabigbig iti aruatna a babai ti soldado.
Ni Sisa nariknana a kas da la tinimam: daydi a babai inna man linabusan iti sangwanan dagiti adu a tattao. Intangadna iti apagbiit dagiti matmatana tapno marnek iti pannakalais ken pannakaibabainna: nakitana dagiti tattao iti adayo, adayo unay kenkuanan, nupay kasta, nariknana ti lamiis ti ikikitada ket nangngegna dagiti ar-arasaas da. Daydi nakakaasi a babai magmagna a dina man marikna ti daga a paypayatenna.
E! ¡ditoy! -inpukkaw ti maysa a soldado nga agbantay.
Kas man maysa a sinantatao nadadael ti mamaggaraw kenkuana, naparpardas unay a nagbaliktad. Ket idi ta awan makitana, dina pinanunot, nagtaray a napan naglemmeng; adda nakitana a maysa a ruangan nga adda soldado nga agbanbantay, kinayatna ti simbrek sadiay, ngem sabali a timek, a naturturay manen, ti namaglisi kenkuana iti dalanna. Maibasingbasing, sinapulna ti turong daydi timek, nariknana nga idurunda ti bukotna, inkidemna dagiti matmatana, immaddang namindua ket piman ta naawanan iti pigsa, natuang iti daga, immuna a naiparintumeng. sa naipatugaw. Maysa a sangit nga awan luana, awan ikkisna. awan asogna ti namagpigerger kenkuana.
