maga; awan uray la kuma no maysa a tumaytayab ti makaitured
a mangpanaw iti linóng dagiti sangsanga.
Ni Sisa dimmanon met la piman iti abongna. Simbrek a siuulimek, awan saona; inunurna, rimuar, pagna la a pagna a ti la naturturungna. Sa nagtaray a napan iti balay ni lakay Tasio, immayab, ngem daydi lakay awan idi. Daydi daksanggasat nagsubli iti balayna ket rinugyanna ti immayab a nagpukpukkaw; !Basilio! !Crispin! kunkunana a sumardeng no maisauna, sana yallingag a nalaing dagiti laplapayagna. Ti aweng ulitenna ti timekna: ti nasam-it a waneswes ti danum ti asideg a karayan, ti anasa-as dagiti bulbulong dagiti kawkawayan is-isudaman laeng ti mangngeg a timek iti let-ang daydi a kinamaymaysa. Sublianna ti umawag, sumang-at iti maysa a turod, sumalog iti maysa a derraas, mapan iti karayan: dagiti matmatana dida makatalna ket nakabutbuteng ti ikikitada, pasarayda sumileng iti nagpaiduma a raniag, sada sumipnget, a kas ti langit iti maysa a rabii, no agdulluog, agkimat ken agsal-it: mabalin a kuna piman a ti silaw ti nakemna rumisrissik ket ngannganin maiddep.
Sinublianna ti immuli iti abongna, nagtugaw iti ikamen a nagiddaanda iti kallabes a rabii, intangadna dagiti matmatana, ket nakitana ti maysa a pirgis ti bado ni Basilio iti murdong ti maysa a balatbat ti diding, a tumapuak iti asideg ti derraas. Timmakder, innalana ket inna inamiris a insiray iti lawag ti init: daydi pirgis, adda darana. Ngem ni Sisa nalabit a dina makita, ta immulog man ket intuluyna nga inam-amiris iti let-ang dagiti makauram a sinsinamar, a daytay inna inngato a nalaing; ket gapo ta kas la itay mariknana nga agsipnget amin ket agkurang ti lawag, kinitana a pinerreng ti init a kasta unay panangimulagatna kadagiti matmatana.
Nagpagnapagna a nagtawtawataw pay laeng, nagpukpukkaw wenno nagung-ungor a sabalin ti aweng a paruarenna; nagbuteng kuma ti inna kenkuana nangngeg: ti timekna sabali ti awengna, saan a ti masansan a patauden ti karabukob ti tao. Iti bayat ti rabii, no daytay umablat ti dawel ket ti angin tumayab a kasta unay pardasna nga inna pakupaken kadagiti di makita a paypayak-na dagiti pinangenpangen nga an-anniniwan a mangkamat kenkuana, ket mairanakay nga adda iti maysa a balay a kabiti a narban ken waywayas, adda inkay mangngeg a senna-ay, asug, a kunayo la no iso ti aweng a patauden ti ilalabas ti angin ka-
