XXII
LA WAG KEN SIPNGET
Tallo nga aldawen dagiti napalabas nanipod idi pannakaaramid dagiti intay nasarsarita. Dagitoy tallo nga aldaw agraman rabii da, inpaay ti ili a San Diego a pinagsagana iti pasungaden a piesta, pinagsasarita ken pinagdadayamudom metten. No madama nga inda nannanamen dagiti masangwanan a ramrambak, addada mangpabasol iti gobernadorsilio; addada mangpabasol iti teniente mayor; addada mangpabasol kadagiti agtutubo, ket di met agkurang dagiti mangpabasol kadakuada amin.
Inda pagsasaritaan ti idadateng ni Maria Clara, a kinuyog ni ikit Isabel. Maragsakanda iti kasdi, piman ta inda kaay-ayo, ket no daytay inda pagsiddaawan ti kinalapsatna, igiddanda met a pagsiddaawan ti panagbaliw ti kababalin ni Padre Salvi. —“Mamin-ado a mapamayeng no agmismisa; dina unay datao kasasaon ket kumutkuttong ken lumidliday” kunkuna dagiti babbai a managkonpesar kenkuana. Ti kosinero makitana a tunggal darikmat agkuttong, ket agasog iti bassit a pammadayawna kadagiti lutlutuenna a sidsida. Ngem ti adadda a tantanawtawen dagiti tattao iso ti makita a pannakasegged ti nasurok a dua a silsilaw iti konbento iti rabii, no daytay mapan ni Padre Salvi sumarungkar iti maysa a balay a naipadpaduma . . . !iti balay ni Maria Clara!! Dagiti mananglualo agugisda, ngem ituluyda it agtantanawtaw.
Ni Juan Crisostomo Ibarra nagtelegrama nanipod iti kabesera ti probinsia a kinablaawanna ni ikit Isabel ken ti kaanakanna, ngem dina inpalawag ti gapo ti kaawanna. Aduda dagiti agkuna a nabalod gapo iti daydi inaramidna ken Padre Salvi idi kammalman ti piesta dagiti amin a Sasanto. Ngem limmalo dagiti sarsarita idi nakitada iti malem ti maikatlo nga aldaw a dimsaag
iti maysa a lugan iti sango ti balay ti as-asawaenna, ket inna kinablaawan a sidadayaw daydi padi, iso nga agturong met idi iti daydi a balay.
— 157 —
