Nasapa, nasapa unay a nagmisa ni Padre Salvi ken nangdalos iti bayat ti sumagmamano a kanito iti sangapulo ket dua a karkararua a narugit, iso a saanna a kadawyan.
Ti inna panagbasa kadagiti nagsangpet a sursurat a kasta unay nagsayaat ti pannakarikep ken lakre ison sa ti nakapukawan toy maikari a kura iti imas ti pannanganna, ta inna man binay-an a bimmaaw a naminpinsan ti chokolate.
—Masakit ni apo padi,—kunkuna ti aglutluto idi madama a mangisagsagana iti sabali a nabayag a saan a makapangpanganen: kadagiti idasarko nga innem a kakita a sidsida, dina pay sagiden ti dua.
—Saan ngamin a nasayaat ti pannaturogna,—insungbat ti ubingna;—managdarepdep nanipod idi immalis iti siled a pagiddaanna. Dagiti matmatana immadaddada a limnek, inaldaw nga agkuttong, ket nabessag unay.
Agpayso, maasi pay ti makakita ken Padre Salvi. Dina kinayat a sinagid toy maikadua a tasa a chokolate, ket dina pay rinamanan dagiti ojaldres a naggapo sadi Sebu: sipapanunot nga agpagnapagna iti nalawa a kadaklan (salas), a pinetpetanna kada giti natulang a im-imana dagiti sursurat a pasarayna basabasaen. Idi kuan, pinaipakatna ti luganna, nagaruat ket inbilinna nga inda itulod iti bakir a yan daydi nakabutbuteng a kayo nga iti asidegna iso ti pakaaramidan ti rambak.
Idi nakadanon iti daydi a disso, ni Padre Salvi pinagawidna ti luganna, ket maymaysa a simbrek iti bakir.
Maysa a nalinong a dana a nganngani kinebbet a naminpinsan dagiti ruruot iso ti pagnaan ket agturong iti maysa a waig a binukel dagiti ado nga ub-ubbog a napudot, nga adda iti sidiran ti bantay Makiling. Dagiti ig-igidna rinamenan dagiti agtubtubo latta a sabsabong, nga ado kadakuada ti awan pay naganda a sao ti latin,
