—Ngem no kasta, uray sika dika met makitan, ket dayta, saan a nasayaat. Ti ket naimbag, no makasaraktay iti umok, itedtay iti kura, iti kasta, mabalinnatay a sisi-imen a saan a masapol a intay makita, Pania ti kunam?
—Diak patpatien dagita nga um-umok ti kannaway, —insungbat met ti maysa a timek, —ngem no kas ta innakto agimon, ammukto ti agsiim ket ammukto met ti pamayan tapno didak makitkita...
—¿Ket, kasano? kasano? dKas ti pamayan ni Sor Esucha?— Naragsak a pagpagaak ti pinarnuay toy naipalagip kadakuada a biag ti kolejiala.
—¡Ammom metten no kasano ti panangallilaw ken Sor Eskucha!
Ni Padre Salvi nakitana nanipod iti naglemmenganna da Maria Clara, Victoria ken Sinang a mangun-unor iti waig. Isuda a tallo magmagnada nga inda kitkitaen ti nalit-naw a danom nga kas sarming nga agsapsapol iti nalmeng a umok ti kannaway: sibabasada inggana iti tumeng, ket naglamma kadagiti akakaba a nagripripian dagiti panpandilingda a pagdigos ti nalibnos a panagimmos dagiti butbutoyda. Nakawakrayda ken silalamulamo; dagiti taktakiagda ken dagiti bagbagida naabbungan iti bado nga akakaba dagiti un-unsoyna ket naragsak dagiti ur-uritna. Dagidi ta'lo a babbalasang igiddanda iti panagsapol da iti awan, ti agala kadagiti sabsabong ken natnateng nga agtubtubo iti igid ti waig.
Daydi Acteon a padi inna buybuyaen a sibebessag ken di makakuti daydi nadarisay a Diana; dagiti matmatana a sumilsileng kadagiti nangisit nga ab-abot ta dida man la mauma a mangbuybuya kadagiti napudaw ken nasayaat ti panagbukbukel da a taktakiag, ti nalapsat a tengnged agraman ti puon ti barukong; dagiti babassit ken lumablabbasit a saksaka nga agay-ayam iti danom, inda man riingen iti napakapsutan a isipna dagiti di marmarna a rikrikna ket inda man pagtagainepen ti narayray a utekna kadagiti baro a panpanunot.
Iti labes ti maysa a nagsikkuan ti waig, iti babaet dagiti nasamek a kawkawayan, nagpukawda dagidi nasam-it a langlanga ket saan a nangngegen dagiti nadawel a paspasagidda. Ni Padre Salvi, a naulaw, maibasingbasing ket nadigos iti linget, rimuar iti nag-
