—¡Pariendak, —kinunana;—ni San Francisco, naimbaga katalek! No panagananyo iti Escuela de Instrucción Primaria, awan maalayo. ¿Asinno kad dayta Instrucción Primaria?
Dimteng dagiti dadduma a gagayyem ni María Clara ket inawisda a mapan agpagpagna.
—Ngem agsublika daras,—kinuna ni Kapitan Tiago iti anak na, idi napan dimmawat iti palubosna;—ammumon a umay mangrabii ditoy ni Padre Dámaso, iso a sangsangpetna.
Sana tinaliaw ni Ibarra, iso a sipapanunot, ket innayunna:
—Mangrabiikay met ditoy; idiay balayyo, maymaysakayo.
—Si-aayatak kuma unay, ngem rebbengko ti agyan idiay balay ania ta adda umay sangaili,-insungbat ti bumaro a kasla narigat ti panagbalikasna, ket inna linisian ti ikikita ni María Clara.
—Yegyo ditoy dagiti gagayyemko—kinuna ni Kapitan Tiago a silalamiis;—ditoy balay adda sagana nga umanay . . . Kayatko pay nga agkaawatankay ken Padre Dámaso...
—¡Addanto kanito iti dayta!—insungbat ni Ibarra nga immisem iti isem a napilpilit ket naggaraw a napan manguyog kadagiti babbalasang.
Immulugda.
Ni María Clara nagtengngaán da Victoria ken Iday, ni ikit Isabel adda iti udi.
Dagiti tattao aglisida a siraraem a mangted iti pagnaanda. Ni María Clara nakaskasdaaw ti libnosna: daydi bessagna nagpukawen, ket no dagiti matmatana sipapanunutda pay laeng, dagiti bibbibigna kas la awan sabali nga ammoda no di umisem. Sipupunno iti ayat, daytay ayat ti maysa a balasang a sigagasat, innalugayan dagiti daan nga am-ammona idi ubing pay, a ita inda man pagsiddaawan ti nagasat a kinabalasangna. Iti uneg ti awan pay sangapulo ket lima nga aldaw, napasublinan daydi natarnaw a panagtalek, daydi naubingan a pannakisarsarita a kas da man itay nailibay kenkuana iti uneg dagiti nailet a kabkabiti ti Beaterio: makuna piman a ti kulibangbang, idi ta napanawanna ti nañgebbet kenkuana, inna nabigbig amin dagiti sabsabong; immanay kenkuana ti inna itatayab iti apagbiit ken ti inna panagpapudot kadagiti naraniag a sinsinamar ti init, tapno inna napukaw ti kinatibkerna idi ta di pay agtayab. Ti baro a biag maipadlaw man iti amin a di mangan-ano ti balasang: iso inna masarakan amin a
naimbag ken nasayaat; inna ipaduyakyak ti ayatna iti daytay nataraki unay a pamayan ti maysa a balasang a di pay natulawan, a
