sagid; ita panpanunutenna ti maysa a balay a bassit iti tuktok ti
maysa a bantay ket kas la inna makitkita ni María Clara iti minuyungan. ¡Iti tanap agyan kad laeng nga aguy-uyas dagiti tattao kadagiti nakaay-ay-ay a pagpagilian da!
Ni Padre Salvi namindua a pinakilli-ingna ti kampanilia, ngem ti kasdi arunanna ti apoy: ni Fray Dámaso natangken ti panagul-ulona ket inyadaddana nga inkatiddag ti sermon. Ni Fray Sibyla kagkagatenna dagiti bibbibigna, ket no manen, inna tarimaanen ti antiukosna a ti sarmingna naala iti dili ket napalawlawan da iti balitok: ni Fray Manuel Martín is-iso laeng ti kas la maragsakan nga agdengdengngeg, ta umis-isem.
Kamaudiananna, isunan, kinuna met la ni Apo Mugna: ti agsermon nabannog ket immulog iti púlpito.
Nagparintumengda amin nga nagyaman ken Apo Mugna. Ti Alkalde linidlidna dagiti matmatana, inyunnatna ti maysa a takiagna, ket jaal a nauneg ti naibbatanna ket nagsuyaab.
Naituloy ti misa.
Idi ta kankantaen da Balbino ken Chananay ti "Incarnatus est," ket nagparintumeng amin dagiti tattao ket dagiti papadi indumugda dagiti ul-uloda, maysa a lalaki ti nangyarasaas ken Ibarra: "Inton maaramid dagiti ramrambak ti pannakabendision, saan kay a umad-adayo iti kura, saan kay a umul-ulog itay bubon, saan kay a umad-adani itay bato, ta pakatayan!"
Ni Ibarra nakitana ni Elías, a idi nasauna toy, nagpukaw
iti yan dagiti tattao.
