Ringringpasen ni Ibarra ti agsukat idi inpakdaar kenkuana ti maysa nga ubingna nga adda maysa nga agtaltalon nga agsaludsod kenkuana.
Gapo ta inpagarupna a maysa kadagiti katalunanna, inbilinna a pastrekenda iti siled a pagad-adalan, biblioteka ken laboratorio kímikona metten.
Ngem nasdaawan iti napalalo ta daydi met nadeggang ken di ma aw-awatan a lañga ni Elías ti nagparang kadagiti matmatana.
—Inispalyo ti biagko,— kinuna ni Elías iti sao ti tagalog, ta naawatanna ti gunay ni Ibarra;— binayadak ti utang ko, nupay saan pay a iso amin, ket awan pambaranyo nga agyaman kaniak. Immayak ta umayak dumawat iti maysa a kaasi . . .
—¡Agsaukayo! —insungbat daydi bumaro iti sao ti tagalog met, a nasdaawan ti kinadeggang daydi agtaltalon.
Ni Elías inperrengna iti apagbiit dagiti matmatana kadagiti matmata ni Ibarra, ket kinunana:
—Inton ti linteg dagiti tattao kayatna a lawlawagan toy a palimed. dawatek kadakayo nga awanto kuma ti inkay pangibisbisikan iti inbagak kadakayo idiay simbaan.
—Saan kay a madanagan, —insungbat daydi bumaro, a kas la nakaluksaw bassit; ammok a sapsapulendakayo, ngem siak saannak nga agisupsuplong.
—O! ¡saan a gapo kaniak, saan a gapo kaniak! —kinuna iti napardas ken panangsiten ni Elías;—gapo kadakayo: awan kabutengko kadagiti tattao.
Ti siddaaw daydi bumaro nanayunan: ti panagsasao daydi a
taga taltalon, a idi kua, mangyurit, baro ket kas la saan a maibagay iti kasasaad ken iti kinapanglawna.
