go!— kinuna dagiti dadduma, a dida la nalagip nga addada a
sisasango ti anak ken ti manmanugangenna.
—¡Awan kasayaatan a inna napili! —insungbat toy.
Dagiti praile nagkikinnitada; dagiti matmatada kayatda a sawen: "Ti Kapitan Jeneral aramidenna manen ti maysa a kinamauyongna, pabainannatayo, rebbengna koma nga agdagus iti konbento." ngem gapo ta kasta amin ti pamanunutanda, agulimekda ket awan mangisawang iti adda iti nakemda.
—Nasauda kaniak dayta idi kalmanen,— kinuna ti Alkalde, —ngem idi, saan pay a nagduyos ti nakem ni Ekselensia.
—¿Ammuyo kadi, Apo Alkalde, no kasano ti kabayagna nga agyan ditoy ti Kapitan Jeneral? —sinaludsod a di makaidna ti alperes.
—Iti kinapudnona, diak ammo; ni Ekselensia kaay-ayuna unay ti mangkelkellaat.
—¡Addada manen nagsangpet a teltelegrama!
Naiturungda iti Alkalde, iti alperes ken iti gobernardorsilio, ket kasdi met laeng ti ipakdaarda: dagiti praile madlawda a nalaing nga awan naiturong iti kura.
—Ni Ekselensia sumangpetto no maikapat a uras no malem, appo!— kinuna ti Alkalde a sidedeggang;— mabalintay ti mangan a sitatalna!
Ni Leónidas saan kuma a nasaysayaat ti inna panangipakdaar idi adda sadi Termópilas: "Inton rabii makisangutayto a mangan ken Pluton!"
Ti panagsasaritada simmubli a kas kadawyan.
—¡Madlawko nga awan tay nalaing a sumermon! —kinuna a sibubuteng ti maysa kadagiti agan-annong, a langana ti saan a makaan-ano, iso a nanipod pay idi simmanguda a nangan, dina pay biningngi dagiti bibbibigna, ket idi, iso ti umuna unay a panagsaona iti daydi a bigat.
Amin dagiti makaammo iti naaramid iti daydi ama ni Crisóstomo naggaraw ket kimmiddayda iti kasla kastoy ti kayatna a sawen: "Inka man dital ¡Di pay ket adda maaramiden!" ngem dagiti dadduma a naay-ayat ti rikna da insungbatda:
—Nabannog ngata bassit...
