Daydi teniente saan a simmungbat; kinitana iti apagbiit ni Padre Salvi, sa immadayo, ket inna tiniritir a sipupungtot ti natirad a murdong ti ub-ubanan a imingna, idi ta dagiti dadduma inda tinuloy ti nagsasarita.
—¡Makita dita ti ima ti Dios!—kinuna ti inaysa;—uray pay dagiti babbai kagurada.
—Pinapuuranna ti balayna, ta inpagarupna nga iso ti pakaispalanna, ngem dina inpapan a ti ay-ayatenna, ti babaina iso ti mangimameg kenkuana, —innayon ti maysa a nagkatawa. —¡Nakem ti Dios! ¡Ni Santiago saluadanna ti Espania!
Idi met ta kasta, daydi lakay a soldado nagsardeng iti maysa kadagiti panagpagnapagnana ket immasideg ken María Clara, iso a si-aallingag kadagiti sarsarita, a di ket makakuti iti tugawna: iti sakaananna iso ti yan dagidi sabsabóng.
—Naánnad kay unay a balasang—kinuna kenkuana daydi lakay a teniente iti nainayad;-naimbag ti inaramidyo a nangted iti surat... iti kasta, mapasingkedan ti natalna a kasakbayanyo.
Ti balasang nakitana nga immadayo, a matana ti napamulengleng, ket kinagatna dagiti bibbibigna. Nagasat ta limmabas ni ikit Isabel Ni María Clara nabalinanna nga inggawid ti aruaten daydi baket.
—¡Ikit!—kinunana.
—¿Ania ti makuam?—sinaludsod toy, a nakigtot idi makitana ti rupa ti balasang.
—¡Itulnugdak iti siled ko!—indawatna ket nagbitin iti takiag daydi baket, tapno makatakder.
—¿Masakitka, anakko unay? Kasmo la napukaw dagiti tultulangmo. ¿Ania ti adda kenka?
—Maulawak... ti kaado dagiti tattao iti salas . . . ti kasta unay a silaw, . . . masapulko ti aginana. masapulko ti aginana. Ibagayo ken ama a maturugak.
—¡Nalamiiska! ¿Kayatmo ti itsá?
Ni María Clara, inwingiwingna ti ulona, rinipkanna a tinulbekan ti ruangan ti siledna ket iti kaawan ti pigsana, napasag iti datar, iti sakaánan ti maysa a ladawan, ket agan-anug-og a kunkunana:
—¡Ina, ina, ina!
Iti tawa ken iti ruangan a mapan iti bansag sumbrek ti lawag
ti bulan.
