Barengbareng ti pannakabunton iti rabaw ti maysa a lamisaán dagiti napateg a sagsagot a maigayat kadagiti agasawa; uray dagiti birbriliante a naikabil kadagiti estuche a tersiopelo a balbag, uray dagiti naburdaán a pinpinia, uray dagiti luplupot a seda, saanda a maawis ti ikikita ni María Clara. Daydi balasang mingmingminganna a dina ket makita ken mabasa ti pagiwarnak a nangipadamag iti ipapatay ni Ibarra, a nalmes iti danaw. Pagammuanen, nadlawna a dua nga ima ti nangappot kadagiti matmatana ken nanengngel kenkuana, sa maysa a timek a naragsak, ti timek ni Padre Dámaso, a nagkuna kenkuana:
—Asinoak? Casinoak?
Ni María Clara limmagto iti tugawna ket kinitana a sikikigtot.
—Tontika, ang-ang, nakigtutka, aya? ¿Saannak a ur-urayen, e? A ket, naggapuak sadi probinsia nga umay tumabuno iti panagasawam.
Ket inasitganna a siisem iti isem ti maka-ay-ayat, inggayatna ti imana tapno agepen ti balasang. Ni María Clara immadani a sipipigerger ket inyasidegna a sidadayaw ti ima daydi praile kadagiti bibbibigna.
—¿Ania ti makuam. María? —sinaludsod daydi pransiskano, a napukawna ti naragsak a isemna ket napnuan iti danag; —ti imam nalami-is, bumsagka?... masakitka, anakko unay?
Ket ni Padre Dámaso inna inawid a sidudungngo unay, nakadungdungo a di ket naipagarop nga addaán iti kasdi a rikna, iniggamanna dagiti dua nga im-ima ti balasang ket inna
nagsaludsudan kadagiti matmatana.
