- 91
Giukab ni Simoun ang ikatulo nga sudlanan.
Kini napuno sa mga orasan, mga pitaka, mga sudlanan sa posporo ug mga “relicario’’ nga dinayandayanan ug mga brilyante ug may mga “esmalte” nga matahum uyamut ug binutangan ug mga magagmayng “dibujo” nga maanindot kaayo.
Ang ikaupat ka sudlanan maoy gitipigan sa mga batong mahal nga wala itaod, ug sa pag-ukab kaniya, usa ka yagungyong sa kahitingala nabati sa hawanan; si Sinang mibalik pagpanakla, gilusi siya pag-usab sa iyang inahan bisan kini wala makapugong sa pag-ingon Sus Maria!
Hangtud niadtong higayona walay usa kanila nga nakakita ug mga bahandi nga samag gldaghanon niadto. Didto niadtong sudlanan nga hinapinan ug “terciopelo” nga bughaw ug maitumitum, binutangan ug mga ulang-ulang, natuman ang mga damgo nga nahisulat sa basahon nga gitawag ug “Mil y una noches,’' ang mga damgo sa hunahuna sa mga tawo nga sidlakanon. Mga brilyante nga tag-ingog liso sa “garbansos” ang gidagkuon, nanggimok ug nagpakitag mga kinidlap nga makabibihag, daw ingon ug nangahilis sila kun misilaob ba dinuktan sa kasiga sa Adlaw nga mosumbalik; mga “esmeralda” sa Peru nga binuhat sa nagkalain-laing panagway, mga “rubi” sa Indiya nga mapula sama sa tinuo nga dugo, mga “zafiro” sa “Seylan,” bughaw ug maputi, mapula-pula ang uban ug ang uban usab lagum-lagum ug maitum. Kadtong nanagpakakita sulod sa kagabhion ug usa ka dakung kuwitis nga mapusgay didto sa kahitas-an sa langit nga bughaw ug maitum-itum, ug unya mangahimong libo ka libo ka mga gagmayng suga, labihan ka siga kay makapalong ngani sa kahayag sa mga bituon, kadto sila makahimo pagbalay sulod sa ilang hunahuna sa panagway niadtong sudlanan sa mga alahas nga atong gihisgotan.
Daw aron pagdugang sa kahitingala nga gibati sa nanagalirong, giukay-ukay ni Simoun ang mga alahas sa iyang tabunon ug sahaong mga tudlo, nalipay nga nagapamati sa ilang tinagingting ug sa ilang mga kinidlap nga sama sa mga tinulo sa tubig nga makahatag ug bulok sa bangaw. Ang mga kinidlap niadtong mga pahiyasa ug ang pagpalandong sa ilang bili nga mahal uyamut, nakadani sa tinan-awan sa nanag-alirong. Si Kabesang Tales, nga miduol aron pagtan-aw, mipiyong ug misibog dayon aron mapapha ang usa ka dautang hunahuna nga milakdop sa iyang panumdoman. Kadtong labihang bahandi nga
