Si Mr. Leeds, usa ka tinuod nga Amerikanhon ug nagsaput
pulos maitum, midawat kanila sa dakung pag-abiabi. Maayo siyang mosulti sa kinatsila, kay dugay man niyang puyo sa Amerika del Sur. Niuyon dayon siya sa gihangyo sa atong mga bisita, giingon sila nga mahimo nila sa paghiling sa tanan, sa tanan gayud, sa dili pa sugdan ug sa human ang salamangka. Samtang hinoon nagsalamangka, gihangyo sila nga dili maglihok. Si Ben Zayb nagpahiyum ug nagpaabut sa kalagut nga giandam niya alang sa Amerikanhon.
Ang lawak, nga gihapinan sa maitum, gisug-an sa mga kingke nga karaan, nga maoy gigamit ang aguardiyente. Usa ka uwanguwang, nga gitabunan usab sa tersiyopilo nga maitum, nagabahin sa lawak sa duha ka bahin nga parehas ug gidak-on ang usa puno sa mga lingkoranan alang sa mga manan-aw, ug ang usa, gibutangan ug usa ka tarima nga hinapinan sa usa ka alpombra nga kuroskuros ang pintal. Sa ibabaw ning tarimaha, sa tungatunga, may gibutang ang usa ka lamisa, nga linimisan sa usa ka maanindot nga panapton nga itum, nga puno sa kalabera ug uban mga dagway nga makapatuy-od sa balhibo. Ang kahimtang sa lawak mao rag makapahadlok, ug kini nakapawala sa katawa sa mga nanambong. Ang mga tiaw mihunong, ang tanan nagsulti sa hinunghungay, ug bisan ang uban nagpakaisug-isug, gilisdan gayud sila sa pagkatawa. Ang tanan mibati ingon sa pagabation sa tawo kon mosulod sa usa ka balay diin adunay minatay nga gihaya. Ang baho sa insiyenso ug sa kandila nakadugang ning pagbatia. Si Don Custodio ug pari Salvi nagpinangotan-anay kon maayo ba kun dili ba maayo nga idili kadtong mga talanawona.
Si Ben Zayb, aron pagdasig sa mga hadlokan ug aron pagapiki kang Mr. Leeds, misulti niini sa hinigala:
