198
nalingaw sa usa ka hunahuna, wala makaalinggat nga ang suga
himatyon na ug moabut na ang kangitngit.
— Sulod sa pila ka adlaw, nagsulti siya nga mao rang usara, kon ang upat ka kilid ning siyudad nga mahugaw magdilaab na, niining siyudad nga poloy-anan sa mga walay alamag, mga garbosohon, nga nabuhi sa pagpanamastamas sa mga burong ug mga alaut; kon ang kagahub modahunog na sa mga balangay ug pagul-on ko sa mga dalan ang akong mga sakop nga puno sa kapungot ug inumol sa ka-ulit ug mga sala, kon modangat na kanang higayona, buksan ko gilayon ang mga paril sa imong bilanggoan, ug dihadiha agawon ko ikaw gikan sa mga kamut sa nagbilanggo kanimo, ug salampating puti, mahisama ka sa langgam Fenix nga motindog sa taliwala sa mga mainit nga abug... Usa ka kagubut nga hinikay sa mga tawo sa taliwala sa kangitngit nakapabulag kanimo sa akong kiliran; karon, usa usab ka kagubot makapahiuli kanimo sa akong mga bukton ug makabanhaw kanako, ug kanang Bu lan, sa dili pa motakdol, mobanwag sa usa ka Pilipinas, nga malinis ug putli sa tanang kahugawan...
Si Simoun mikalit paghilum, sama sa hisud-ipan. Usa ka tingog nangotana sa ilalum sa iyang tanlag kon siya, si Simoun, dili ba lakip sa kahugaw niadtong siyudad nga banyaga, tingali gani hinoon ang labing hugaw. Ug sama sa mga minatay nga mangabanhaw sa tingog sa trompita sa pagpanudya, libo ka libong mga aninong samaran, mga landong sa mga tawong gibuno, mga babaye nga nawad-an sa ilang kaputli, mga amahan nga gilangkat sa ilang kabanayan, mga bisyo nga pinasagdan ug dinasig, mga bililhong hiyas nga tinamay, namangon karon sa pagkadungog sa lanog sa makalilisang pangotana. Mao pa kadtoy higayon sa iyang kinabuhing kriminal sukad pa sa Habana, diin pinaagi sa bisyo ug sa hiphip, gisugdan niya ang pagmugna usa ka paagi aron pagpalungtad sa iyang mga tuyo, siya nga usa ka tawo nga walay pagtoo, walay pagbati sa iyang lungsod ug walay kasingkasing, niadto pang higayona nga mibati siya usa ka pagbasul, usa ka kaulaw sa iyang kaugalingon. Gipiyong niya ang iyang mga mata, ug sa dugay nga panahon wala siya maglihok; unya minghikap siya sa iyang agtang, ug midumili siya pagsud-ong sa iyang tanlag, ug unya giabut siyag kahadlok. Dili, dili siya buot mosusi sa iyang
