usa ka basahon mahitungod sa Kasanihan, nahimong Puli-Pangulo sa Junta de la Sanidad de Manila, bisan hinoon sa walo nga sakop niini usa day kinahanglan mananambal. Mao usab, nahimo siyang Bokal sa Junta Central de Vacuna, nga gisakpan sa tulo ka mananambal ug pito ka dili, uban niini ang Arsobispo ug tulo ka Probinsiyal sa mga prayle. Nahimo siyang
Hermano sa mga Cofradia ug mga Archicofradia, ug sumala sa
atong nakita, Bokal Ponente sa Comision Superior de Instruction
Primaria nga kanunay nga dili maglihok, mga katarungan kini nga igo aron ang mga mantalaan magpuno kaniya sa pagdalayeg, kon mopanaw siya ug hangtud kon baha-on siya.
Bisan daghan kaayo siya mga katungdanan, si Don Custodio dili sama nianang mga tawo nga mahikatulog sa mga tigum ug mohatag sa iyang boto uban sa kadaghanan, sama sa mga diputado nga taspukan ug hadlokan. Lahi sa kadaghanan sa mga hari sa Oropa nga nagdala sa titulo nga Hari sa Herusalem, si Don Custodio nagpakita sa iyang kaugdang ug nagpahimulos uyamut sa iyang katungdanan, kanunay nga magpakisdum sa iyang kilay, magpagawpagaw sa iyang tingog, mag ubo-ubo ug sa daghang higayon siya da ang makasulti sa tibook nga tigum, pinaagi sa pagsugilon usa ka sugilanon, pagpasakag usa ka hunahuna kun pagsupak sa usa ka kauban nga mosukol kaniya sa lantugi. Bisan wala pa siya makalabang sa kap-atan ka tuig ang panuigon, kanunay na siya nga magtambag sa paglakaw sa mahinay nga tingog, nga hunahunaon una pag-ayo ug magbantay sa paglakaw, kay kinahanglan nga ilhon una ang Kapopod-an, kay ang kahimtang sa mga indiyo, kay ang kabantug sa ngalan sa mga katsila, kay una sa tanan sila mga katsila, kay ang tinuhoan, ug uban pa. Hangtud karon hinumduman pa sa Manila ang usa niya ka pakigpulong sa diha nga gihunahuna ang pag-ilis sa mga suga sa kadalanan gikan sa lana sa lubi ngadto sa gas: niadtong kausabana, wala mahunahuna ni Don Custodio ang kamatayan sa patigayon sa lana sa lubi, ug mao day iyang nakita ang tinguha sa pagpanapi sa usa ka Konsehal, kay si Don Custodio ugod taas ug panlantaw, ug mao kadto nga gisupak niya sa tanang kusog sa iyang tutonlan ug iyang giingon nga kadtong hunahuna sayo da uyamut ug nagpasidaan siya sa daghang mga kadautan nga moabut. Nabantug usab ang iyang pagsupak sa usa ka serenata nga buot ihatag sa pipila sa bisperas sa paggikan sa usa ka Gobernador: si Don Custodio nga may kahimangod nga gitagoan
