210
sa mga panahon nga motungha ang iyang mga maayong handurawan. Pagkadaghan sa mga hunahuna nga wala maabut sa laing tawo, kadaghan sa mga maanindot nga mithi ug mga paagi aron sa pagluwas sa kawad-on sa mga pilipinhon... Sa walay duhaduha, dili na siya hikalimtan sa iyang yutang natawhan ug ang iyang ngalan wala nay kamatayon ...
Sama sa usa ka tigulang kundatan nga makakita sa usa ka hinugpong nga mga sulat sa gugma, mitindog pagkalit si Don Custodio ug midool sa estanti. Ang unang binugkos, nga baga, puno ug nagbagal nagdala sa ulohan: Mga HUNAHUNA NGA GIHUNAHUNA PA.
— Dili, nagpangyamyam siya, aduna kiniy mga butang nga katingaiahan, apan nagkinahanglan kitag usa ka tuig aron sa pagbasa pagbalik...
Ang ikaduha, nga baga gihapon, may ulohan: MGA HUNAHUNA NGA GITUN-AN ... Dili kini gihapon...
Unya, sunod ang mga HUNAHUNA NGA GIPAHINOG... MGA HUNAHUNA NGA GIPASAKA NA ... MGA HUNAHUNA NGA GIUYUNAN ... MGA HUNAHUNA NGA WALA IPAHINAYON ... Kining mga ulahing bugkos nipis da, apan labi pa gayud nga nipis ang sa mga HUNA HUNA NGA GISUNOD NA...
Nikusmod ang ilong ni Don Custodio ... unsa kahay iyang sulod? Nahikalimut na siya. Usa ka papil nga madalag na maoy midayag sa taliwala sa duha ka hapin, ug kadto nakahatag kaniyag katin-awan.
Iyang gikuha sa estanti ug giukab: mao ang nabantug nga hunahuna sa pagtukod usa ka ESCUELA DE ARTES Y OFICIOS.
— Daan pa ako, nakatu-aw siya; apan dili ba mao na may nangako niini ang mga prayleng agustinos? ...
Unya mihikap siya sa iyang agtang, gipakunot ang iyang kilay, ug usa ka timaan sa kahinangop mitungha sa iyang panagway.
— Nia na ang hukom, misinggit siya sa usa ka pulong nga dili eureka, apan nga nagsugod diin matapus kining pulonga. Ania na ang hukom ko.
