sa iyang kalo, sama sa pagkalahi sa usa ka kombento nga ma hitupad sa usa ka Exposition Universal. Kon si Pansat nga Luto napulapula, siya tabunon; kadto nga kaliwat sa katsila walay usa ka lugas nga bungot, samtang siya nga usa ka indiyo, may patilya ug nagpatubog bungot nga puti, tag-as ug halhag. Ang iyang tinan-awan madasigon. Gitawag siyag Tiyo Kiko, ug, sama sa iyang higala, nabuhi usab sa pagsangyaw. Mosangyaw siya sa mga dula ug mamilit mga pamantala sa mga tiyatro. Tingali siya da ang bugtong pilipinhon nga magkalog adolpo nga maglakat lamang, sama nga ang iyang higala mao ray katsila nga nagyubit sa kabantug sa iyang kaliwat.
— Gisuholan akog maayo sa pransiyanhon, miingon siya nga nagkatawa ug nagpadayag, sa iyang pagngislit, sa iyang mga lagos nga sama sa usa dalan human hiagi-i sa usa ka sunog; palaran ako karon nga namilit sa mga kartil...
Si Pansat nga Luto igo lamang mipakibo sa iyang abaga.
— Kiko, misulti siya sa iyang tingog nga lawom ug nagdahunog, kon tagaan kag unom ka pisos sa imong trabaho, pila kahay gihatag sa mga prayle?
Si Kiko, sa iyang naandan nga kakilas mihangad:
— Sa mga prayle?
— Kay aron ka masayud, mipadayon si Pansat nga Luto, kining pagkapino sa tiyatro buhat kini sa mga kombento...
Tuod man, ang mga prayle, pinangulohan ni Pari Salvi ug sa pipila ka mga tawo nga gipangulohan ni Don Custodio, misupak ning talan-awona. Si Pari Camorra, nga dili makatambong, naglugdat lang ang mga mata ug naglaway ang baba, apan nakiglantugi kang Ben Zayb, nga milaban ug diyutay sa mga magdudula, tungod kay nakahunahuna sa mga tikit nga walay bayad nga ipadala kaniya sa kompaniya. Si Don Custodio naghisgut sa maayong pamatasan, sa tinuhoan, sa mga talanawon nga dili mahilas, ug uban pa.
— Apan, mitubag ang magsusulat, ang ato nga mga dula nga kataw-anan, tungod sa ilang mga sulti nga tagurhay hinungdan...
— Apan, sinulat sa kinatsila, — misanta nga nagsinggit ang santolong konsehal, nga namula sa langitnong kalagut; samtang ang mga mahilas nga sulti nga pinaransis, pastilan, Ben Zayb.
