Nagpadayon pag-abut ang mga sakyanan ug nangabut ang mga magdudula nga nanulod sa laing pultahan, sinunod sa ilang mga higala ug sa mga nangaibug kanila.
Si Paulita misulod na, ug mipadayon si Tadiyo:
— Kana mao ang mga pag-omangkon sa adunahan nga Kapitan D., kanang nanagsakay sa lando; nakita mo, pagkamaanindot no, ug pagkamaayog mga lawas? Puwes, dili dangtag pila ka tuig kana sila mangamatay kun dili man gani mabuang... Si Kapitan D. supak nga sila maminyo, ug ang kabuang sa oyoan motungha sa mga pag-omangkon... Kana mao si Gining E., ang sapiang sumusunod nga giilogan sa kalibutan ug sa mga kombento... Hilum... kana hiilhan ko ... si Pari Irene, nga wala magpaila, nga nagbutag bungotbungot . . .Hiilhan ko siya tungod sa iyang ilong... Ug kon hunahunaon ta nga siya supak kaayo niini...
Ang bukidnon gihilasan nga nagtan-aw, ug nakita niya nga nawala sa luyo sa usa ka pundok sa mga babayc ang usa ka lebita nga maayo nga pagkatabas.
— Ang tulo ka mga panagway sa Kamatayon...mipadayon pagsulti si Tadiyo sa pagkakita nga nangabut ang tulo ka mga babaye nga ga-uga lamang ang panagway, mga bukogon, naglugdak ang mga mata, dagkug baba, ug mangil-ad kaayog binistihan. Ginganlag si...
— Atropos? misulti paghinay ang bukidnon, nga buot mopasabut nga siya usab adunay hibaloan nga diyutay sa Mitolohiya...
— Dili, dili, ginganlan silag ang mga dalaga sa Bintana, mga hinaway, mga hamtong, mga balhiboon... Nasilag sila sa tanan, sa mga lalaki, sa mga babaye, sa mga bata... Apan, tan-awa, sa luyo sa Dautan, si Bathala magbutang usab ug maayo. ugaling ulahing moabut. Sa luyo nianang mga hulagway sa kamatayon, nga gikalisangan sa tibook siyudad, nangabut kanang tulo, nga maoy himaya sa ilang mga higala, ug usa kanila ako. Kanang batan-on nga da-ut, nga lugdat ug mga mata, bako ug diyutay, ug nga kusog nga mangompas kay wala na makapalit ug tikit, mao ang Kimiko nga si S. tagbuhat sa daghang mga basahon sa kinaadman, nga gigantihan ang kadaghanan, ug kahibulongan ang tanan; ang mga katsila nag-ila nga siya adunay kaugmaon... Kanang nagbugnaw
