ni Basilio kay nasakit sa gastritis (hubag sa atay): gilamoy niya
ang usa ka lata nga mostasa aron pagpaila nga siya oropanhon...
Niadtong higayona ang orkista mitogtog usa ka vals.
— Nakakita ka nianang tawhana? nianang niwang nga naglingilingi aron sa pagtan-aw kon duna bay moyukbo kaniya? Mao kana ang nabantug nga gobernador sa Pangasinan, usa ka tawo nga kawad-an sa gana sa pagka-on kon adunay usa ka indiyo nga dili moyukbo kaniya... Dlriyut siya mamatay kon wala pa niya ikapagula ang bandilyo sa mga pagyukbo, nga maoy nakapabantug kaniya ... Alaut nga tawo ... Tulo na ka adlaw nga nahiabut siya gikan sa lalawigan, hilabihan ang paghugo niya... Oy, ania ang dakung tawo, ang bantugan, buk-a pag-ayo ang imong mga mata...
— Kinsa? Kanang tawo nga nangunot ang kilay?
— Oo, kana mao si Don Custodio, ang liberal nga si Don Custodio, nag-abut ang iyang kilay kay nagpalandong tingali sa usa ka hinungdanon nga butang sa pamunoan... kon matuman pa lamang ang iyang tanan nga hunahuna, lain ang mahitabo dinhi sa ato. Oy, ania usab si Makaraig, ang imong kauban sa balay...
Tuod man, nangabut si Makaraig, kuyog kang Pecson, Sandoval ug Isagani. Si Tadiyo, sa pagkakita kanila, midool ug nakighimamat.
— Dili ka motan-aw? nangotana kaniya si Makaraig.
— Wala kami makapalit ug mga tikit...
— Duna kamiy palko, misulti si Makaraig; si Basilio dili makaanhi... uban kamo kanamo...
Si Tadiyo wala maghulat nga usbon pa ang pagdapit. Ang bukidnon, nga nahadlok nga makasamok siya, inubanan sa kataha nga kaugalingon sa usa ka dili siyudadnon, mibalibad ug bisan giunsa na lamag dapit wala gayud mosulod.
