Walay nakakita sa alahiro, bisan sa mga butaka, sa ilisan sa
mga magdudula ug sa bisan diing dapita.
— Ug unya hikit-an ko siya karong hapon nga nagsultig si Mr. Jouy, misagbat ang usa.
— Ug mihatag usa ka kolyar sa usa sa mga magdudulang babaye....
— Kinsa man niana ang iyang gitagaan?
— Ang hawod sa tanan, kadtong gitutokan pag-ayo sa Iyang Kamahalan.
Mga tinan-awan nga masinabtanon, mga kilo, mga pagtuaw nga matahapon, mga hongihong....
— Ngano, nagpaka Montecristo siya? misagbat ang usa ka babaye nga buot mopaila nga himasa siyag mga sugilambong.
— Kun magpapalit ba hinoon sa Balay nga Harianon, midugang ang maghahalad niadtong babayhana, nga nagsugod nag pangabubho kang Simoun.
Sa palko sa atong mga batan-on nahibilin si Pekson, Sandobal, ug Isagani. Si Tadiyo miadto pagtupad kang Don Custodio, aron paglingaw niini ug pagsulti mahitungod sa iyang mga maanindot nga hunahuna, samtang si Makaraig nakigsulti kang Pipay.
— Sa walay duhaduha, sumala sa gisulti ko na kanimo, higala, Isagani, nagpakutab si Sandobal, nga nangompas pagayo, aron ang iyang tagming mga tingog hibatian sa mga dalaga nga nanglingkod sa palkong silingan, nga mga anak sa adunahan nga nakautang kang Tadiyo; sa walay duhaduha, balikon ko ikaw pag-ingon, ang pinulongang pinaranses dili makatupong sa katam-is ug katahum sa kinatsila. Ako dili makahunahuna, ako dili makatuo nga may mga maayo bang mamumulong nga pransiyanhon. Tingali wala gayud kanilay kanganlan tag tinuod nga mamumulong. Kay dili ta tawgon nga mamumulong ang mga tabi-an. Daghang mga tabian sa tanang nasud sa kalibutan, bisan sa mga mabugnawon ug mahilumon nga mga inglis, hangtud sa mga abtik nga mga pranses....
Ug naghimo siyag matahum nga pag-asoy sa mga nasud, uban sa ilang mga kinaiya ug mga maanindot nga hiyas. Si Isagani igo lang moyango sa pagtangdo, samtang ang huna-
