- 349
ting-init! Kadto maoy higayon.nga si Abraham-Ben Zayb makadalayeg sa iyang bathala!
Ang mga tulisan nakakuhag kapin sa duha ka libo ka pisos, gibiyaan nga samdan ang usa ka pari ug duha ka binatunan... Ang kura nanalipod kutob sa mahimo sa iyang kaugalingon didto sa luyo sa usa ka lingkoranan, nga nag-uba diha sa iyang mga kamot...
— Yauna, yauna! — miingon si Ben Zayb nga nagkuhag balita; — kap-atan kun kalim-an ka mga tulisan ang mihugpa pagkalit... mga rebolber, mga sundang, mga eskopeta, mga pistola. . mga leon nakigdumog, lingkoran. . . nangabali. . . gisamaran sa mananap ... napulo ka libo ka pisos...
Ug madasigon ug wa pa gayod matagbaw sa mga gibalita, mibalhin pa gayod sa dapit nga hitaboan, nga gisulat nang daan sa dalan ang asoy sa tulis. Usa ka pagpadasig gipasulti sa pangulo? Usa ka pulong sa pamiaybiay sa ba-ba sa pari? Tanang mga pananglitan ug mga pagtanding, mga gigawi niya sa Iyang Kamahalan, kang P. Irene ug kang P. Salvi, mahiangay gayod pag-ayo alang sa paring nasamad, ug ang iyang paglarawan sa kawatan alang sa tagsatagsa ka mga tulisan. Sa mga pagmaymay makahimo pa unta nga iyang. lugwayan, ma himo pa niya pagsulti bahin sa tinuhoan, sa pagtoo, sa kalooy, sa mga pagbagting sa lingganay, ang sa mga indiyo nautang nilang kabubot-on sa mga prayle, paglukmay ug paghilis kanila pinaagi sa mga pulong hinashasan. Ang mga dalaga sa kaulohan mubasa kaniya ug magkanayon:
— Si Ben Zayb maisog ingon sa leon ug malumo ingon sa usa ka karnero!
Sa pag-abot niya sa dapit nga hitaboan, sa dakong kahitingala niya iyang gihibalag nga ang samdan dili diay lain kon dili si P. Camorra, ang sinilutan sa ilang Pangulo sa pagpaantos sa balay sa kalipay sa daplin sa Pasig, tungod sa iyang mga binuang sa lungsod sa Tiani. Adunay diyutay nga samad sa kamot, usa ka garas sa ulo sa pagkahulog niya nga natakliad; ang mga kawatan tutolo ug pulos nanagtakin ug sundang; ang salapi nga ilang nakawat, kalim-an ka pisos.
— Dili mahimo! — miingon si Ben Zayb; — mohilom ka ... wala ka masayod sa ginaingon!
