- 373
nga nawad-an na sa kusog ug kadasig? Hain na kamo, tatan-on, kami naghulat kaninyo.
Ug kay gibati niya nga nangluha ang iyang mga mata, ang paring tigulang mitindog sa paghinay ug mitambo sa bintana aron pagtan-aw sa baybayon. Nasumpo ang iyang pagpalandong, sa diha nga nakabati siya nga may mitoktok sa pultahan. Ang binatonan diay nga misulod ug nangotana kon dagkutan ba niya ang suga.
Sa pagdool sa pari sa masakiton ug sa pagkakita niya, binanwagan, sa suga, nga kini wala maglihok, ang mga mata nagpiyong ug ang kamut binuklad, gipaingon niya nga natulog lamang, apan sa diha nga iyang nakita nga wala na magginhawa, iyang gitapin-an ang agtang ug nakita niya nga kini mabugnaw na.
Miluhod siya dayon ug nangadyi,
Sa pagtindog na niya ug pagsud-ong sa minatay, kansang panagway mao rag matag-an ta ang mga kasakit ug kagool nga ivang giantus, ang pari nagkanayon:
— Nga pasayloon ni Bathala ang tanan nga nagpasalaag kaniya sa matarong nga dalan....
Ug, samtang ang mga binatonan, nga gipanawag niya, nanluhod ug nangadyi, gikuha ni Pari Florentino sa iyang tagoanan ang malitang puthaw, nga gisudlan sa mga bahandi ni Simoun Nagpanuko siya sa sinugdan, apan kini makadyot da. Gialsa niya ang malita, ug nanaug siya sa hagdanan, padulong sa dakung pangpang nga pagalingkoran ni Isagani kon kini makigsulti na sa mga balud sa kadagatan.
Midungaw si Pari Florentino sa bung-aw. Sa ubos, ang balud nga gikan sa lawod sa Pasipiko, mga dagkung balud nga mohaganas pag-ayo kon mosangko na sa pangpang. Maanindot ug makalilisang ang talan-awon ubos sa pangpang. Milingi ang pari. Walay nagsunod kaniya. Siya da ang nag-inusara. Layo da kaayo ang pikas nga baybayon ug hapit gani dili maabut sa panan-aw sa iyang mga mata, luyo sa pangpang ang mga kahoy sa lasang nag-awit sa ilang dili masabut nga awit. Ginamit ang tanan niyang kusog, gialsa ni Pari Florentino ang ma lita ug iya kini nga gihulog sa dagat. Ang malita mituyok
