- Ich weiss nicht was soil es bedeuten
- Dass ich so traurig bin!
- Ich weiss nicht was soil es bedeuten
Sa pagpanghatag ug katahuran ni P. Florentino sa diyutay nga pundok wala na didto magahari ang dautang buot nga mingturok kaganina gumikan sa miaging mga lantugi. Kaha nakatabang paghupay sa mga hunahuna ang masadyang mga balay sa lungsod sa Pasig, ang pipila ka kopa nga binong Jerez nga ilang giinom aron ganahan nga mokaon, kun ang paghunahuna ba sa usa ka maayong pamahaw; bisan hain niining duroha ka butang ang nakaingon, ang matuod mao nga nanag-utas na sila ug katawa ug tiaw-tiaw, lakip ang pransiskano nga maniwang bisan wala kaayo kini magasaba: ang iyang mga katawa mahilom sama sa kinataw-an sa usa ka himalatyon.
— Mangil-ad nga mga panahona karon, mangil-ad! — nagkanayon nga nagkatawa si P. Sibyla.
— Oh, ayaw pagsulti niana, Vice-Rector! — mitubag ang “canonigo” nga si P. Irene ug giduso niya ang siya gilingkoran ni P. Sibyla; — didto sa Hongkong daku kaayo ang inyong masapi ug matagbalay nga inyong tukoron . . . na, ayaw na lamang!
— Hinay-hinay, hinay-hinay! — mitubag si P. Sibyla; — kamo wala man ugod makakita sa among mga gasto, ug ang nanagabang sa among mga “hacienda” makiglalis na karon inigbayad nila . . .
— Na, igo nang mulo, bilanggotanan, kay kon dili, mohilak hinoon unya ako!
— Misinggit nga malipayon si P. Camorra. — Kami bitaw dili man managmahay, ngani wala kami ing mga “hacienda” ni mga “banco.” Ug hibaloi baya ninyo nga ang mga sakop kong “indio” magsugod na paghangyo sa mga balayran sa Simbahan ug maantigo nang mosubay sa mga “tarifa!” Bilanggotanan! Su-
