Sto sü, o pövel, da curadsch' armo!
Il saung dels frers possauntamaing ans clama:
»Davent da nus, davent la schlatt' infama!«
3 Lügl 1867.
Simpatia.
Il prüm affet cha'l cour umaun resainta
Sco sbrinzl' eterna ivided' in el,
Quel ascendent chi volunted movainta
E l'orm' inuonda d'raz celestiel,
Ais il liam, chi cour a cour collia:
Ais simpatia.
La püra flamma ch'our d'virtüd ho vita,
As stüzza be tres fled d'la fraida mort
Quel sentimaint, chi d'ogni bain s'infitta
Al anim duna ün divin accord,
Ais il liam chi me a te collia:
Ais simpatia.
Quel zart resun cha'l cour bain dutsch favella
Ch'all' orma mia fet regal d'na sour,
Quel fö da Vesta, pür sco giuvintschella,
Viv s'alimainta nel profuond del cour.
Ais il liam chi'm lia all' orma tia:
Ais simpatia.
2 December 1870.
