This page has been proofread.
Del vent la mistic' armonia,
Chi tres ils pins suschura bain,
Ans disch: »O resta vossa lia
»Adüna verda, sco convain!«
»Pêsch!« ans acclama l'uond' azzura
Da noss bels lejs in sun contschaint;
»Cha ogniün pel bön lavura
Ed ogniün saro containt!«
»Fermezz' in ogni evenienza!«
L'antic granit favell' a nus;
»Immacoled' indipendenza,
Virtüd conserva löng tiers vus!«
L'ovel suot vusch a violetta
Suschura pleds d'etern' amur,
Sorria sco staila quell' ümletta,
Tratt' aint in abit da candur.
Dal spelm grischaint cascata crouda
E ravaschia fo tres il god;
Ün inno d'glori' intuorn ün oda
E glüsch inuonda plaun ed ot.
La liberted, la prümavaira,
Ün chaunt sublim d'eterna fé,
Infuond' in nus leidezza vaira;
Ün ais beo containt usche.
