This page has been proofread.
E quaista, cher' amia,
Cridet sovenz con me;
Cumpagna dutscha mia,
Eau t'am, se bain perche!
L'infloudra ais stacheda,
Svanida la colur!
Fidella, rass' ameda,
Eau t'am con vair' amur!
20 November 1868.
Il carneval moura.
L'ais morent! el moura, moura!
Al clinger del plain magiöl,
Tres il fraid e la nosch' ora,
D'üna tabe mour' il vegl;
Sper il led dad el sun quia
Il dalet e l'allegria.
L'allegria, sa figlia chera,
Ais afflicta, crida zuond,
II dalet cun greiva tschera,
Bain demuossa led profuond.
Povers orfens sainza tet,
Vos vegl bap s'abbandunet !
