revocau ed annulau, sch'ei havess saviu esser. Muort respect e reverenzia duida alla Sontga Sedia han els buc ughiau de luvrar encunter aviartamein, denton ei quei vegniu fatg sin vias e sendas indirectas. La „Curta Memoria“ (p. 250) raquenta sco suonda: „Igl Uestg ha clomau e laschau vegnir tier El ils Spirituals dellas numnadas pleifs, comondont a quels a quels, ch'Els duessen instigar e surplidar ils pievels de lur pleifs, che quels cun tut lur poder e cun tutta forza semetessen e figiessen encunter a quella midada e faitg accort, e ch'Els mai duessen secontentar ded esser ne star sut agli Avat u alla claustra. Quei ei era daventau: pertgei ch'ils Spirituals e Seculars part per far plascher a lur Uestg, part per il schliet cor che schiglioc portan ina part encunter ils Religius, han faitg ed exequiu il Camond cun tut fliss e quitau, cun tal effect, che bunamein tut era encunter, e nagin secuntentava de vegnir sut alla Claustra, en staigl digl Uestg.“
Enderschent il Nunci quell'opposiziun, ha el relaschau ils 13 de November 1655 in rigurus decret als plevons e caplons dils capetels de Muster, Uors, Foppa ed Ursera ed admoniu els danovamein sut peina de suspensiun ed inhabilitat tier dignitats de corrispunder a siu exprimiu commond enteifer de siat dis.[1]
Stermentai entras tal decret, han enzaconts paucs spirituals dellas numnadas plaivs reconoschiu igl Avat de Muster per lur superiur ed engirau fideivladat. Denter quels ei stau in dils principals Nicolaus Genelin, plevon a Sumvitg.[2]
1656, ils 4 de Schaner, tut sur ura, han ils spirituals della Cadi teniu capetel a Trun per secussegliar e sedeliberar sur quella impurtanta caussa. Era Avat Adalbert II, accompignaus da P. Maurus Cathrin,[3] ei comparius sin quei capetel. El ha mess avon leu als spirituals cun tutta ruasseivladat las respectivas scartiras de Papa Urban VIII e de Innocens X, sco era la convenziun fatga denter igl Uestg de Cuera e la Claustra da Muster cun intervenziun ed approbaziun dil Nunci. Denton tut ei stau adumbatten. Ils spirituals ein perseverai en lur opiniun e han refusau scadina sutmissiun ed obedientscha alla Claustra, nunditgont ils commonds e las
- ↑ La „Synopsis“ e „Cuorta Memoria“ portan il complein verbal de questa scartira.
- ↑ Nicolaus Genelin (Jenelino de Casura) ei staus plevon a Breil 1625–1634; a Schlans 1634–1646; a Sumvitg 1652–1658 † 1. de Matg.
- ↑ In P. Maurus Cathieni, sco la Cuorta Memoria porta p. 251 e ch'auters scribents han copiau, ha la Claustra de Muster buca giu. Ei senza dubi in sbagl cun Cathrin.
