[Eg:]
16. Is ed imorro dochúaid Mider siar co Magh na Cruachna. „Cid do maith dúinniu itir tadhall in maighi siu?“ for Croichean Croderg. „Bid he t’ainm bías for in maigh siu co brath“, for Midir, „i. Mag Cruachan, ocus Raith Cruachan“. Dochúatar iartain co sith sínighe Crúachan, dáig rob fagus a cairdess, ocus ro batar co cenn nómidi ann hic tomailt ocus ic fledugud, conid ann atbert Croichenn fri Mider: „Inní so do treb-sa?“ Atbert Mider fri Croichin: „Iss ann ata mo treb-sae, tair ic taurcbáil na gréni“. Luid Mider iarsin ocus Ettain co Breg Leth mic Celtcair.
17. Is ann sin imorro ro chuirestair Eochaid eclacha hErenn ocus a oblori ocus a tarralaigh ṡliged ocus a techta coicrichi úad fo hErinn d’iarraidh[1] a mnae. Dochuaidh Eochaid fein iarsin fo Eirinn d’iarraidh Etaine, ocus bliadain on ló cu céle do ga hiarraidh ocus nis fuair, ocus do riacht i cinn bliadno co dún Frémaind.
18. Is ann sin ro chuir Eochaid a drui d’iarraidh Etaine, i. Dalán a ainmm in drúadh. Is edh tanicc reime an la sae síar connicci in slíab rissin-apur Sliab Dálán, ocus ro bui ann in oidqi[2] sin. Ba tromm imorro laissin druid dicheilt Etáiniu fair fri re bliadna, co n‑dernui iarsin IIII flescca ibir ocus scrípuidh oghumm inntib, ocus foillsighthir do triana eochraib écsi ocus triana oghumm, i. Etain do bith i sith Breg Leith iarna breth do Midir inn.
19. Is and sin dana dochúaid Dálán sair doridisi gu dun Frémainn úail hirra bua Eochuid ri hErinn. Ro ḟiarfuigh[3] Eochaid dia drui a sceulu. Is annsin imorro do riachtatar a echluchu ocus a oblori ocus a tharralaigh ṡligiuth ocus a techta coiccrichi dochum ri hErinn, ocus ro ḟíarfuigh[3] sceula dib, an fúaratar sgéulu Midir ocus Etáini. Ocus adrubrutar ni fúaratar, conid annsin atbert a drúidh friss: „Rotirmaiss écaine ocus mór olcc ocus imniuth duit bith i
9
