[LU:]
Nóidin ocus maccáim impu do cach aird, ocus ceól enlathe muintire nime oca n‑airfitiud. Buidne ana do ainglib coimthechta inna n‑anmand oc umallóit ocus oc timthirecht eter na hairichtaib sin i fiadnaisi ind ríg dogrés. Ni chumaic thra nech isin bith frecnairc-sea túarascbail no innisin inna n‑airecht sin, amal itát iar fír. Na buidne ocus na hairechta dan fili i tír na nǽb, amal ro radsem, bid at marthanaig isin morgloir sin co mordail bratha, co ros coraigea in brithem firén illathe ind fugill isna sostaib ocus isna inadaib i m‑bíat oc déscin gnússe Dé cen fial cen forscáth etarru tria bithu na m‑betha.
7. Cid mór imorro ocus cid adbul in taitnem ocus in t‑soilse fil i tír na nǽm, amal ro rádsem, is aidbliu fo mile ind etrochta fil immaig muintire nime im rigsuide in comded fessin. Is amlaid iarom atá in rigsudi sin inna chathair chumtachta co cethri colomnaib do liic logmair foi. Cén co
[LBr:]
ica n‑oirfited do gres. Búidne ána athluma do ainglib coemthechta inna n‑anmand ic umaloit ocus oc timthirecht itir na hoirechtu sin i fiadnaise in rig do gres. Ni chumaic tra nech for bith tuaruscbail na aisnés na n‑oirecht sin, amal atat iar fir. Na búidne ocus na hoirechtu tra filet a tír na noem amal atchuadmar, bíd at marthanaig isin glóir sin co mordáil bratha, conas coraigea in fírbrithem do ló in ḟuigill isna sostaib i m‑biat oc decsiu (sic) gnúsi Dé cen fíal etarru do gres.
7. Cid mór immorro ocus cid adbul in taitnem ocus in t‑sollsi fil i tír na nóem, amal atcuadmar, is áidbli fo míle in etrochta fil immuig muntiri nime im rígṡudi in choimded fesin, Is amlaid tra ata in rigṡudi sin ina chathair cumdachta co cetri colamnu do líce logmair fói. Ocus cen co beth d’oirfited do nech acht coicetul comchubaid na colamun
