꧋ꦲꦶꦁꦔꦪꦺꦴꦓꦾꦩꦼꦤ꧀ꦠꦱ꧀ꦮꦺꦴꦤ꧀ꦠꦼꦤ꧀ꦥꦉꦥꦠꦤ꧀ꦤꦶꦁꦥꦫꦮꦂꦒꦪꦺꦴꦁꦆꦱ꧀ꦭꦩ꧀ꦩꦶꦠꦼꦤ꧀ꦧꦺꦴꦤ꧀꧈ꦫꦩꦼꦱꦔꦼꦠ꧀꧉ꦉꦩ꧀ꦧꦒ꧀ꦲꦶꦁꦥꦉꦥꦠ꧀ꦠꦤ꧀ꦔꦿꦶꦏꦸꦧꦝꦼꦚꦠꦸꦁꦒꦭ꧀ꦭꦏꦼꦤ꧀ꦥꦏꦼꦩ꧀ꦥꦭ꧀ꦭꦤ꧀꧈ꦲꦶꦁꦏꦁꦤꦩ꧇ Al Islam Lique Indonesia꧉
꧋ꦕꦫꦔꦪꦺꦴꦓꦾꦲꦶꦁꦧꦧ꧀ꦥꦁꦏꦠ꧀ꦭꦸꦫꦃꦠꦸꦩꦸꦫꦸꦤ꧀ꦝꦠꦼꦁꦮꦫꦶꦱ꧀ꦱꦩ꧀ꦥꦸꦤ꧀ꦢꦶꦥꦸꦤ꧀ꦲꦶꦕꦭ꧀ꦭꦶ꧈ꦱꦥꦸꦤꦶꦏꦠꦸꦩꦶꦤ꧀ꦢꦏ꧀ꦏꦶꦁꦥꦩꦶꦭꦶꦃꦭꦸꦫꦃꦱꦫꦤꦢꦶꦥꦸꦤ꧀ꦭꦺꦴꦠꦽ꧉ꦠꦸꦮꦶꦤ꧀ꦧꦺꦴꦠꦼꦤ꧀ꦏꦼꦔꦶꦁꦩꦶꦭꦶꦃꦠꦶꦪꦁꦱꦏꦶꦁꦱꦗꦮꦶꦤꦶꦁꦝꦸꦱꦸꦤ꧀꧉ꦥꦠꦿꦥ꧀ꦥꦶꦁꦥꦔ꧀ꦭꦺꦴꦠꦽ꧈ꦥꦫꦕꦭꦺꦴꦤ꧀ꦭꦸꦫꦃꦱꦩꦶꦏꦥꦸꦫꦶꦃꦩꦼꦤ꧀ꦝꦼꦠ꧀ꦭꦶꦤ꧀ꦠꦶꦁꦔꦤ꧀ꦢꦭꦚ꧀ꦕꦁ꧈ꦲꦶꦁꦏꦁꦲꦶꦱꦶꦥꦿꦶꦱ꧀ꦤꦩꦸꦁꦱꦠꦸꦁꦒꦭ꧀꧉ꦢꦺꦫꦺꦁꦭꦩꦶꦲꦶꦁꦏꦭꦸꦫꦃꦲꦤ꧀ꦒꦺꦴꦤ꧀ꦝꦔ꧀ꦭꦼꦒꦶꦏꦧꦸꦥꦠꦺꦤ꧀ꦏꦶꦛ꧈ꦩꦼꦤ꧀ꦠꦱ꧀ꦠꦸꦩꦶꦤ꧀ꦢꦏ꧀ꦩꦏꦠꦼꦤ꧀꧈ꦲꦶꦁꦏꦁꦲꦁꦱꦭ꧀ꦥꦿꦶꦱ꧀ꦗꦓꦧꦪꦲꦶꦁꦓꦶꦧꦼꦫꦤ꧀꧉
꧋ꦱꦏꦶꦁꦔꦪꦺꦴꦓꦾꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦫꦢꦺꦤ꧀ꦠꦸꦩꦼꦁꦒꦸꦁꦲꦂꦗꦏꦸꦯꦸꦩ꧈ꦥꦸꦠꦿꦤꦶꦥꦸꦤ꧀ꦱꦸꦮꦂꦒꦶꦓꦸꦱ꧀ꦠꦶꦦꦔꦼꦫꦤ꧀ꦲꦂꦪꦨꦸꦩꦶꦤꦠ꧈ꦏꦗꦸꦩꦼꦤꦼꦁꦔꦏꦼꦤ꧀ꦥꦔꦼꦫꦤ꧀ꦱꦤ꧀ꦠꦤ꧈ꦮꦶꦮꦶꦠ꧀ꦲꦶꦁꦱꦥꦸꦤꦶꦏꦲꦁꦱꦭ꧀ꦱꦼꦱꦼꦧꦸꦠ꧀ꦠꦤ꧀ꦥꦔꦼꦫꦤ꧀꧉
꧋ꦢꦢꦺꦴꦱ꧀ꦮꦢꦤꦲꦶꦁꦯꦸꦏꦤꦒꦫ꧈ꦫꦢꦺꦤ꧀ꦫꦁꦒꦄꦃꦩꦢ꧀ꦦꦿꦮꦶꦫꦄꦢꦶꦤꦶꦔꦿꦠ꧀꧉ꦲꦶꦁꦯꦸꦏꦧꦸꦩꦶ꧈ꦫꦢꦺꦤ꧀ꦫꦁꦒꦮꦶꦫꦲꦢꦶꦉꦗ꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀ꦱꦏꦶꦁꦨꦤ꧀ꦝꦸꦁ꧈ꦏꦭꦢꦶꦤ꧀ꦠꦼꦤ꧀ꦉꦧꦺꦴꦲꦶꦁꦏꦁꦏꦥꦼꦁꦏꦼꦂ꧈ꦮꦚ꧀ꦕꦶꦗꦩ꧀ꦱꦠꦼꦔꦃꦤꦼꦩ꧀꧈ꦏꦩ꧀ꦥꦸꦁꦱꦮꦶꦁꦏꦶꦁꦠꦺꦴꦏꦺꦴA.B.C. ꦲꦶꦁꦨꦤ꧀ꦝꦸꦁꦏꦼꦧꦼꦱ꧀ꦩꦺꦤ꧀꧈ꦠꦼꦭꦱ꧀ꦒꦿꦶꦪꦥꦶꦠꦸꦁꦮꦸꦮꦸꦁ꧈ꦏꦥꦶꦠꦸꦤꦤ꧀ꦤꦶꦥꦸꦤ꧀ꦏꦠꦥ꧀ꦱꦶꦂꦮꦺꦴꦤ꧀ꦠꦼꦤ꧀ f 2000,-꧉
꧋ꦆꦤ꧀ꦱꦶꦚꦸꦂꦩꦱ꧀ꦯꦸꦲꦂꦠꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦭꦤ꧀ꦧꦲꦎꦏꦺꦴꦤ꧀ꦱꦸꦭꦺꦤ꧀꧈ꦲꦶꦁꦥꦏꦂꦪꦤ꧀ꦧꦧ꧀ꦠꦠꦤꦺꦤ꧀꧉
꧋ꦠꦸꦮꦤ꧀ A. van Rietschoten ꦫꦸꦩꦶꦪꦶꦤ꧀ꦄꦱꦶꦱ꧀ꦠꦺꦤ꧀ꦉꦱꦶꦝꦺꦤ꧀ꦠꦱꦶꦏ꧀ꦩꦭꦪ꧈ꦱꦥꦸꦤꦶꦏꦏꦺꦴꦤ꧀ꦠꦿꦺꦴꦭꦶꦂꦲꦶꦁꦕꦶꦭꦕꦥ꧀꧈ꦲꦁꦱꦭ꧀ꦕꦕꦢ꧀ꦢꦤ꧀ꦱꦏꦶꦁꦥꦩꦉꦤ꧀ꦠꦃ꧈ꦲꦶꦁꦧꦧ꧀ꦤꦭꦶꦏꦮꦺꦴꦤ꧀ꦠꦼꦤ꧀ꦉꦉꦱꦃꦲꦶꦁꦕꦶꦪꦩꦶꦱ꧀꧉
꧋ꦏꦧꦂꦫꦶꦥꦸꦤ꧀ꦲꦶꦁꦯꦸꦫꦏꦂꦠꦱꦩꦁꦏꦼꦧꦧ꧀ꦥꦔꦸꦢꦶꦤꦶꦥꦸꦤ꧀ꦝꦠꦼꦁꦏꦒꦸꦤꦤ꧀ꦤꦧꦸꦃꦒꦁꦱꦢꦶꦥꦸꦤ꧀ꦱꦤ꧀ꦠꦺꦴꦱꦤ꧀ꦤꦶꦱꦪꦼꦏ꧀ꦠꦺꦴꦱ꧀꧈ꦲꦶꦁꦩꦸꦱꦼꦪꦸꦩ꧀ꦯꦿꦶꦮꦼꦢꦫꦶꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦮꦸꦭꦁꦔꦤ꧀ꦤꦧꦸꦃꦒꦁꦱ꧈ꦱꦶꦤ꧀ꦠꦼꦤ꧀ꦤꦏꦼꦩꦮꦺꦴꦤ꧀꧈ꦱꦫꦤꦲꦩ꧀ꦧꦪꦂꦱꦏꦼꦝꦶꦏ꧀ꦏꦥꦉꦁꦔꦏꦼꦤ꧀ꦠꦸꦩꦸꦠ꧀ꦱꦶꦤꦲꦸ꧈ꦲꦶꦁꦩꦁꦏꦲꦶꦁꦏꦁꦩꦸꦭꦁꦥꦫꦲꦃꦭꦶꦒꦼꦤ꧀ꦝꦶꦁꦱꦢꦪ꧉ꦲꦶꦁꦏꦩ꧀ꦥꦸꦁꦏꦩ꧀ꦥꦸꦁ꧈ꦥꦸꦤꦥꦩꦭꦶꦃꦲꦶꦁꦏꦩ꧀ꦥꦸꦁꦗꦓꦱꦸꦫꦤ꧀꧈ꦏꦛꦃꦱꦔꦼꦠ꧀ꦥꦏꦼꦩ꧀ꦥꦭ꧀ꦭꦤ꧀ꦥꦏꦼꦩ꧀ꦥꦭ꧀ꦭꦤ꧀ꦲꦶꦁꦏꦁꦱꦼꦢꦾꦤꦶꦥꦸꦤ꧀ꦲꦔꦸꦢꦶꦝꦠꦼꦁꦒꦼꦤ꧀ꦝꦶꦁ꧉ꦢꦺꦫꦺꦁꦢꦔꦸꦥꦸꦤꦶꦏꦲꦶꦁꦯꦸꦫꦏꦂꦠꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦱꦠꦸꦁꦒꦶꦭ꧀ꦭꦶꦥꦸꦤ꧀ꦥꦏꦼꦩ꧀ꦥꦭ꧀ꦭꦤ꧀ꦲꦶꦁꦏꦁꦢꦶꦥꦸꦤ꧀ꦥꦔꦂꦱꦤ꧀ꦤꦶꦢꦼꦤꦶꦁꦫꦢꦺꦤ꧀ꦩꦱ꧀ꦲꦂꦪꦮꦶꦂꦪꦢꦶꦟꦶꦔꦿꦠ꧀꧈ꦱꦲꦮꦂꦒꦤꦶꦥꦸꦤ꧀ꦱꦢꦪꦱꦩꦶꦥꦫꦲꦃꦭꦶꦒꦼꦤ꧀ꦝꦶꦁ꧈ꦩꦼꦁꦒꦃꦱꦼꦢꦾꦤꦶꦁꦥꦏꦼꦩ꧀ꦥꦭ꧀ꦭꦤ꧀ꦮꦲꦸ꧈ꦧꦺꦴꦠꦼꦤ꧀ꦔꦼꦩꦸꦁꦔꦏꦼꦤ꧀ꦧꦝꦼꦲꦚꦩ꧀ꦥꦸꦂꦤꦏ꧀ꦲꦏꦼꦤ꧀ꦏꦱꦒꦼꦢ꧀ꦢꦤ꧀ꦤꦶꦥꦸꦤ꧀ꦝꦠꦼꦁꦒꦼꦤ꧀ꦝꦶꦁ꧈ꦲꦤꦔꦶꦁꦲꦸꦒꦶꦧꦝꦼꦔꦭꦸꦱ꧀ꦱꦏꦼꦤ꧀ꦒꦼꦤ꧀ꦝꦶꦁꦒꦼꦤ꧀ꦝꦶꦁꦲꦺꦁꦒꦭ꧀꧉
꧋ꦏꦧꦂꦫꦶꦥꦸꦤ꧀꧈ꦧꦶꦏꦏ꧀ꦲꦶꦥꦸꦤ꧀ꦏꦺꦴꦁꦒꦿꦺꦱ꧀ꦩꦸꦃꦲꦩ꧀ꦩꦢ꧀ꦢꦶꦪꦃꦲꦶꦁꦔꦪꦺꦴꦓꦾꦏꦂꦠ꧈ꦥꦸꦤꦶꦏꦠꦁꦒꦭ꧀꧇꧔꧇ꦙꦤꦸꦮꦫꦶ꧈ꦲꦸꦥ꧀ꦧꦼꦱ꧀ꦠꦶꦂꦩꦸꦃꦲꦩ꧀ꦩꦢ꧀ꦢꦶꦪꦃꦔꦠꦸꦫꦶꦯꦩ꧀ꦥꦼꦪꦤ꧀ꦢꦊꦩ꧀ꦲꦶꦁꦏꦁꦯꦶꦤꦸꦲꦸꦤ꧀ꦏꦁꦗꦼꦁꦯꦸꦭ꧀ꦠꦤ꧀꧉
꧋ꦲꦶꦁꦠꦲꦸꦤ꧀ꦥꦸꦤꦶꦏꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦠꦶꦪꦁꦩꦶꦁꦒꦃꦏꦗꦶ꧈ꦲꦶꦁꦏꦁꦱꦏꦶꦁꦨꦤ꧀ꦝꦸꦁꦏꦼꦩꦮꦺꦴꦤ꧀ꦮꦺꦴꦤ꧀ꦠꦼꦤ꧀ 1109꧈ꦠꦶꦪꦔꦶꦥꦸꦤ꧀ꦲꦺꦱ꧀ꦠꦿꦶꦮꦺꦴꦤ꧀ꦠꦼꦤ꧀ 408 ꦠꦸꦮꦶꦤ꧀ꦭꦉ 108꧉
Aneta ꦩꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦲꦶꦁꦏꦁꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦥꦺꦴꦏꦿꦸꦭ꧀ꦗꦼꦤ꧀ꦢꦿꦭ꧀꧇ꦥꦢꦸꦏꦠꦸꦮꦤ꧀ Mr. Onnen ꦱꦩꦁꦏꦼꦔꦱ꧀ꦠꦄꦠ꧀ꦥꦺꦴꦏꦠ꧀ꦗꦼꦤ꧀ꦢꦿꦭ꧀꧉
꧋ꦱꦏꦶꦁꦯꦸꦫꦧꦪꦏꦮꦂꦠꦺꦴꦱ꧀ꦱꦏꦼꦤ꧀꧇ꦲꦶꦁꦯꦸꦫꦧꦪꦢꦺꦫꦺꦁꦢꦔꦸꦥꦸꦤꦶꦏꦢꦶꦥꦸꦤ꧀ꦲꦼꦢꦼꦒ꧀ꦒꦏꦼꦤ꧀ꦕꦧꦁꦔꦶꦁꦥꦏꦼꦩ꧀ꦥꦭ꧀ꦭꦤ꧀ P.N.I. (ꦥꦂꦠꦼꦤꦱꦶꦪꦺꦴꦤꦭ꧀ꦆꦤ꧀ꦝꦺꦴꦤꦼꦱꦶꦪꦃ)꧈ꦢꦼꦤꦼꦲꦶꦁꦏꦁꦏꦥꦶꦭꦶꦃꦢꦢꦺꦴꦱ꧀ꦥꦔꦿꦺꦃꦲꦶꦥꦸꦤ꧀꧇ꦠꦸꦮꦤ꧀ꦮꦁꦯꦏꦸꦱꦸꦩ꧈ꦥꦔꦂꦱ꧈ꦭꦤ꧀ꦠꦸꦮꦤ꧀ Ir. ꦄꦤ꧀ꦮꦫꦶ꧈ꦥꦤꦶꦠꦿ꧉
꧋ꦧꦼꦚ꧀ꦗꦶꦁꦠꦁꦒꦭ꧀ 27 ꦉꦗꦼꦧ꧀ꦲꦶꦁꦔꦗꦼꦁꦥꦸꦤꦶꦏ꧈ꦏꦊꦉꦱ꧀ꦩꦶꦏꦿꦢ꧀ꦢꦊꦩ꧀ꦏꦁꦗꦼꦁꦤꦧꦶꦩꦸꦃꦲꦩꦢ꧀ s.a.w. ꦥꦏꦼꦩ꧀ꦥꦭ꧀ꦭꦤ꧀ꦩꦸꦃꦲꦩ꧀ꦩꦢ꧀ꦢꦶꦪꦃꦲꦶꦁꦯꦸꦫꦏꦂꦠꦧꦝꦼꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦲꦫꦏ꧀ꦲꦫꦏꦤ꧀꧈ꦏꦼꦩ꧀ꦥꦭ꧀ꦭꦶꦥꦸꦤ꧀ꦠꦶꦪꦁꦮꦲꦸꦧꦝꦼꦮꦺꦴꦤ꧀ꦠꦼꦤ꧀ꦲꦶꦁꦩꦼꦱ꧀ꦗꦶꦢ꧀ꦄꦒꦼꦁ꧈ꦱꦲꦲꦶꦁꦔꦿꦶꦏꦸꦧꦝꦼꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦱꦼꦱꦺꦴꦫꦃꦮꦂꦤꦶꦮꦂꦤꦶ꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦧꦼꦚ꧀ꦗꦶꦁꦱꦊꦧꦼꦠ꧀ꦠꦶꦥꦸꦤ꧀ꦮꦸꦭꦤ꧀ꦥꦼꦧꦿꦸꦮꦫꦶ꧈ꦤꦉꦤ꧀ꦢꦿꦲꦶꦁꦯꦶꦪꦼꦩ꧀ꦧꦝꦼꦔꦗꦮꦶ꧉
꧋ꦱꦏꦶꦁꦔꦪꦺꦴꦓꦾꦏꦂꦠꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦧꦼꦠꦭ꧀ꦩꦶꦱ꧀ꦠꦼꦂꦥꦧꦿꦶꦏ꧀ꦒꦼꦤ꧀ꦝꦶꦱ꧀ꦲꦶꦁꦉꦮꦸꦭꦸ꧈ꦩꦶꦫꦸꦢꦏꦤ꧀ꦛꦶꦲꦩ꧀ꦧꦼꦏ꧀ꦠꦲꦂꦠꦠꦠꦁꦒꦼꦭ꧀ꦭꦤ꧀ꦤꦶꦥꦸꦤ꧀ f 500,-꧉
꧋ꦮꦺꦴꦤ꧀ꦠꦼꦤ꧀ꦏꦧꦂ꧈ꦧꦶꦭꦶꦃꦲꦁꦱꦭ꧀ꦲꦁꦱꦭ꧀ꦭꦤ꧀ꦤꦶꦥꦸꦤ꧀ꦥꦱꦂꦢꦂꦩ꧈ꦲꦶꦁꦏꦁꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦢꦼꦤꦶꦁꦥꦏꦼꦩ꧀ꦥꦭ꧀ꦭꦤ꧀ꦠꦸꦩꦿꦥ꧀ꦥꦩꦸꦭꦱꦫꦤꦶꦥꦸꦤ꧀ꦠꦶꦪꦁꦩꦶꦱ꧀ꦏꦶꦤ꧀ꦲꦶꦁꦔꦪꦺꦴꦓꦾꦏꦭꦠꦁꦒꦭ꧀ 3 ꦝꦼꦱꦺꦩ꧀ꦧꦼꦂꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦏꦥꦺꦴꦠꦺꦴꦁꦮꦫꦒꦢ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧈ꦠꦏ꧀ꦱꦶꦃꦮꦺꦴꦤ꧀ꦠꦼꦤ꧀ꦠꦶꦫꦃꦲꦤ꧀ f 5102.04꧉
꧋ꦱꦏꦶꦁꦔꦪꦺꦴꦓꦾꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧇ꦧꦝꦼꦥꦸꦠꦿꦩꦤ꧀ꦠꦸꦢꦊꦩ꧀ꦱꦩ꧀ꦥꦼꦪꦤ꧀ꦢꦊꦩ꧀ꦲꦶꦁꦏꦁꦯꦶꦤꦸꦲꦸꦤ꧀ꦲꦶꦁꦔꦪꦺꦴꦓꦾꦏꦂꦠ꧈ꦫꦢꦺꦤ꧀ꦩꦱ꧀ꦑꦥꦶꦫꦸꦭ꧀ꦑꦸꦠꦿꦠꦶ꧈ꦧꦝꦼꦏꦥꦫꦶꦁꦔꦤ꧀ꦱꦱꦼꦧꦸꦠ꧀ꦠꦤ꧀꧇ꦥꦔꦼꦫꦤ꧀ꦱꦲꦲꦱ꧀ꦩꦤꦶꦥꦸꦤ꧀ꦏꦒꦤ꧀ꦠꦺꦴꦱ꧀꧇ꦑꦁꦗꦼꦁꦦꦔꦼꦫꦤ꧀ꦲꦂꦪꦦꦏꦸꦤꦶꦁꦔꦠ꧀꧉ꦢꦼꦤꦼꦥꦸꦠꦿꦶꦢꦊꦩ꧀ꦏꦥꦫꦶꦁꦔꦤ꧀ꦲꦱ꧀ꦩ꧇ꦑꦁꦗꦼꦁꦬꦠꦸꦦꦩ꧀ꦧꦪꦸꦤ꧀꧉
ꦥꦮꦂꦠꦺꦴꦱ꧀ꦱꦏꦶꦁꦉꦝꦏ꧀ꦱꦶ
꧋ꦠꦸꦮꦤ꧀ꦄꦠ꧀ꦩꦱꦸꦲꦢꦶꦲꦶꦁꦱꦫꦶꦉꦗ꧈ꦏꦭꦶꦮꦸꦔꦸ꧈ S.C.S. ꦥꦚ꧀ꦗꦸꦫꦸꦁꦥꦚ꧀ꦗꦼꦤꦼꦁꦔꦤ꧀ꦧꦺꦴꦠꦼꦤ꧀ꦏꦥꦕꦏ꧀꧈ꦲꦮꦶꦠ꧀ꦥꦏꦧꦂꦫꦤ꧀ꦮꦲꦸꦱꦩ꧀ꦥꦸꦤ꧀ꦭꦸꦁꦱꦼ꧉
꧋ꦊꦁꦒꦤꦤ꧀ ꦤꦺꦴꦩꦼꦂ 2564 ꦲꦶꦁꦦꦸꦂꦮꦉꦗ꧉ꦥꦚ꧀ꦗꦸꦫꦸꦁꦧꦺꦴꦠꦼꦤ꧀ꦏꦥꦕꦏ꧀꧈ꦏꦶꦫꦁꦩꦶꦒꦸꦤꦤꦶ꧉ꦏꦗꦮꦺꦤ꧀ꦤꦺꦴꦩꦼꦂ 44ꦏꦏꦶꦤ꧀ꦠꦸꦤ꧀ꦤꦤ꧀꧉ꦊꦱ꧀ꦠꦤ꧀ꦠꦸꦤ꧀ꦤꦶꦁꦢꦢꦺꦴꦱ꧀ꦊꦁꦒꦤ꧀ꦤꦤ꧀ꦱꦩ꧀ꦥꦸꦤ꧀ꦏꦥꦺꦔꦼꦠ꧀ꦠꦤ꧀꧉
꧋ꦊꦁꦒꦤꦤ꧀ꦤꦺꦴꦩꦼꦂ 2716 ꦲꦶꦁꦨꦚ꧀ꦗꦂꦤꦒꦫ꧉ꦉꦔꦼꦁꦉꦔꦼꦁꦧꦺꦴꦠꦼꦤ꧀ꦏꦊꦧꦼꦠ꧀꧉ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀ꦔꦼꦤ꧀ꦠꦺꦴꦱ꧀ꦱꦶꦥꦥꦤ꧀꧉
